Memlekettik hatshy birqatar elshilerden senim gramotalaryn qabyldady

ASTANA. 20 mamyr. Memlekettik hatshy Gúlshara Ábdiqalyqova Meksıka, Venesýela, Kongo Respýblıkasy, Koreıa Halyqtyq Demokratııalyq Respýblıkasy, Sýdan Respýblıkasy jáne El-Salvador Respýblıkasynyń Qazaqstandaǵy Tótenshe jáne ókiletti elshilerinen senim gramotalaryn qabyldady. Bul týraly akorda.kz habarlady. Memlekettik hatshy Meksıka, Venesýela, Kongo jáne KHDR-dyń ýákiletti ókilderin «EKSPO 2017» kórmesin ótkizý quqyǵyn alý barysynda Astananyń kandıdatýrasyna qoldaý kórsetkenderi úshin, sondaı-aq, Meksıka, Venesýela, Salvador jáne KHDR elshilerine 2017-2018 jyldary BUU Qaýipsizdik Keńesiniń turaqty emes músheligine Qazaqstan Respýblıkasynyń kandıdatýrasyn qoldaǵandary úshin alǵysyn bildirdi. Gúlshara Ábdiqalyqova Meksıka elshisi Marta Elena Barsenamen áńgime barysynda Meksıka Qazaqstannyń Latyn Amerıkasyndaǵy Brazılııadan keıingi iri saýda seriktesi ekenin atap kórsetti. Qazaqstan men Meksıka arasyndaǵy 2014 jylǵy taýar aınalymy 120,8 mln. AQSh dollaryn qurady. Memlekettik hatshy Qazaqstanda ashylýy 2015 jylǵa josparlanyp otyrǵan Meksıkanyń elshiligi arqyly tikeleı dıplomatııalyq qarym-qatynas ornatý elaralyq baılanystardy saıası jáne ekonomıkalyq qana emes, áleýmettik-gýmanıtarlyq salalarda da tereńdetýge múmkindik týǵyzatynyn atap ótti. Ekijaqty kezdesý barysynda memleketaralyq qarym-qatynastardy damytýdyń jaı-kúıi men keleshegi talqylandy. Gúlshara Ábdiqalyqova atap kórsetkendeı, jahandaný jaǵdaıynda saıası, ekonomıkalyq, saýda, ǵylymı, mádenı jáne basqa salalardaǵy yntymaqtastyqty damytý bizdiń memleketterimizdiń ulttyq múddelerine saı keledi. Osyǵan oraı, dıplomatııanyń tabystylyǵyn ózara is-qımyldyń deńgeıi aıqyndaıdy. Taraptar keń aýqymdy máseleler boıynsha baılanystardy keńeıtýge ózara múddelilik tanytty. Olardyń qatarynda, qarjy, munaı-gaz jáne taý-ken ónerkásibi salalaryndaǵy, azyq-túlik ónimderi óndirisindegi, balamaly energetıkadaǵy jáne basqa da salalardaǵy yntymaqtastyqtar bar. Memlekettik hatshy atalǵan memleketterdiń Tótenshe jáne ókiletti elshileriniń qyzmetteri bizdiń elderimizdiń arasyndaǵy yntymaqtastyq áleýetin arttyrýǵa yqpal etedi dep úmittenetinin aıtty. Elaman Qońyr. Derek, sýret: akorda.kz.