Elbasy «Qazaqstan temir jolynyń» prezıdenti Asqar Mamındi qabyldady

ASTANA. 20 mamyr. Memleket basshysy «Qazaqstan temir joly» aksıonerlik qoǵamynyń prezıdenti Asqar Mamındi qabyldady. Bul týraly akorda.kz habarlady. Asqar Mamın Elbasyna kompanııanyń qazirgi qyzmeti, onyń enshiles kásiporyndarynyń tıimdiligin arttyrý sharalary, negizgi jobalardyń júzege asyrylý barysy jáne aldaǵy kezeńge arnalǵan josparlary týraly baıandady. Qazaqstan Prezıdenti elimizde iske asyrylyp jatqan «Nurly jol» baǵdarlamasynyń mańyzdylyǵyna, onyń aıasynda aýqymdy jumystar josparlanǵanyna toqtaldy. «Astanadan shuǵyla tárizdi taraıtyn avtokólik joldaryn salý jáne qalpyna keltirý máselesin turaqty baqylaýda ustaý qajet. Bul jumystar óndirýshilerdi tehnıka men qurylys materıaldaryn jetkizý jónindegi tapsyrystarmen qamtamasyz ete otyryp, mýltıplıkatıvti áserge ıe bolmaq. Bul ekonomıka úshin qıyn ýaqytta ony damytýdyń draıverine aınalady. Bizdiń elimiz Jibek jolynyń «ekonomıkalyq beldeýine» kiretindikten, Qytaı Halyq Respýblıkasy da qoldaý kórsetetin bolady», – dedi Memleket basshysy. Elbasy Astanada halyqaralyq qarjy ortalyǵyn qurý isi de kólik-logıstıka salasyn damytý jumystaryn júrgizýdi qajet etetinin aıtty. «Elordany Dýbaı, Frankfýrt, Gonkong sııaqty jetekshi qarjy ortalyqtarymen baılanystyrý qajet. Azamattyq avıasııa salasynda osyǵan daıyndalyp, jańa baǵyttardy ıgergen jón. Sonymen qatar biz ishki reısterdi keńeıtý úshin avıakompanııalar qurýǵa tıispiz», – dedi Nursultan Nazarbaev. «Qazaqstan temir joly» aksıonerlik qoǵamynyń prezıdenti «Nurly jol» baǵdarlamasy aıasynda jańa temirjol, avtomobıl magıstraldaryn salý, teńiz porttary men áýejaılardyń ınfraqurylymyn qaıta jóndeý boıynsha aýqymdy jumys júrgizilip jatqanyna toqtaldy. Sonyń ishinde ol ınfraqurylymdyq damý josparynda mejelengen birqatar iri jobalardyń júzege asyrylýy týraly aıtty. Batys óńirdiń kólik júıesin damytý maqsatynda Aqtaý teńiz portyn keńeıtýge múmkindik beretin úsh jańa júk termınaly salynǵanyn jáne Borjaqty–Ersaı temirjol jelisiniń qurylysy júrip jatqanyn jetkizdi. Asqar Mamın Qazaqstandy Eýrazııanyń kólik-logıstıka habyna aınaldyrý jónindegi mindetterdi júzege asyrý úshin qajetti kúsh-jiger jumsalyp jatqanyn atap ótti. Sol úshin eldiń ishinde jáne shetelde logıstıkalyq ınfraqurylym salý jumystary júrgizilýde. Máselen, Qytaı–Qazaqstan–Eýropa baǵytynda konteınerlik tasymal sońǵy úsh jyldyń qorytyndysy boıynsha 15 esege ósedi dep josparlanýda. Sonymen qatar, Úndistanǵa tranzıttik tasymal uıymdastyrý máselesi de pysyqtalýda. Memleket basshysy kezdesý qorytyndysy boıynsha birqatar naqty tapsyrma berdi. Elaman Qońyr. Derek, sýret: akorda.kz.