Elimizdiń damýyna, onyń álem aldyndaǵy bedeliniń artýyna súbeli úles qosyp júrgen boıjetkenderimiz az emes. Ásirese, sport salasynda ter tógip, bási bıik básekelerde el namysyn abyroımen qorǵap júrgen arýlarymyzdyń qatary jyl saıyn artyp keledi. Túsine bilgenge, bul úlken jetistik.
Sońǵy jyldary elimizdiń ǵana emes, búkil álemniń nazaryn ózine aýdaryp, laıyqty baǵasyn alyp júrgen qyzdarymyzdyń arasynda voleıbolshy Sabına Altynbekovanyń esimin erekshe aıtýǵa bolady. 1996 jyly Aqtóbe qalasynda týǵan sportshy qyz 14 jasynan bastap voleıbolmen shuǵyldana bastaıdy. «Qazhrom» (Aqtóbe), «Almatınochka» (Almaty) klýbtarynda óner kórsetken ol mamandardyń nazaryna iligip, 17 jasynda, ıaǵnı 2013 jyly voleıboldan Qazaqstan áıelder quramasyna qabyldanady.
Sabına Teıbeı qalasynda jalaýyn kótergen Azııa chempıonatynda jurtshylyqtyń erekshe iltıpatyna bólenip, tanymaldylyǵy arta tústi. Voleıboldan 19 jasqa deıingi qyzdar arasynda ótken bul básekede qazaq qyzynyń oıynyndaǵy sheberligine, ózin-ózi ustaýyna, júris-turysyna jáne kórki men tula boıynyń symbattylyǵyna talaılar tánti boldy. Qytaı, Japonııa jáne basqa da azııalyq elderdiń jýrnalısteri Sabınadan jarysa suhbat alyp, reportajdar túsirdi. Sol sııaqty ınternette kóptegen rolıkter paıda boldy. Azııalyq jankúıerler onyń kelbetiniń túrli jaǵymdy keıipkerlerge uqsaıtynyn jetkizdi. О́z kezeginde bizdiń qoǵam sheteldikterdiń bul sportshymyzǵa degen qurmetin jalpy qazaq qyzdaryna kórsetilgen ystyq yqylas dep qabyldady. Osy arada bir aıta keter jaıt, tanymaldylyǵy kúrt ósken voleıbolshy arý munyń bárin salqynqandylyqpen qabyldady. Asyp-sasqan joq. Keýdemsoqtyqqa, tákapparlyqqa boı aldyrmaı, naǵyz qazaq qyzyna tán baısaldylyq tanyta bildi. Bul Sabına Altynbekovanyń zor qurmetke laıyqty arý ekenin bildirse kerek.
Osy oraıda taǵy bir sportshy qyzymyz – Zarına Dıas jóninde de az-kem toqtala ketsek artyqtyq etpes.
Búginde Zarınany álem tanıdy. 1993 jyly Almaty qalasynda týǵan ol tennıste joǵary kórsetkishke qol jetkizgen qazaqstandyq alǵashqy sańlaq. Zarına sporttaǵy juldyzdy jolyn 2009 jyly bastady. Sodan beri ol ITF sanatyndaǵy týrnırlerde 5 márte jeńiske jetken. Sondaı-aq, 2014 jyly Osakada (Japonııa) ótken WTA týrnırinde fınalǵa deıin jetti. Al tennıste shoqtyǵy bıik bolyp sanalatyn «Úlken Dýlyǵa» týrnırlerine osyǵan deıin 5 ret qatysty. Sonyń ishinde eń joǵarǵy nátıjesi 2014 jylǵy Ýımbldon týrnırinde tirkeldi. Naqty aıtar bolsaq, sol jarysta bizdiń qyz 4-shi aınalymǵa deıin jetti. Jalpy, Zarına «Úlken Dýlyǵa» básekelerine tek 2014 jyldan beri qatysa bastady. Aıta keteıik, ótken jyldyń basynda Zarına WTA reıtınginde júzdikke de kirmeıtin edi. Al sol jyldyń sońynda álemdegi eń úzdik 40 tennısshiniń qataryna qosyldy. Búginde saıypqyran sańlaǵymyz jahannyń 32-shi raketkasy. Buryn-sońdy Qazaqstan tennısi tarıhynda dál mundaı mejege eshkim jetken emes.
Joldybaı BAZAR,
«Egemen Qazaqstan».
