О́rimdeı ónerli óren

Mektep – balanyń órisin keńeıtip, ómir ketigin taýyp kirpishteı qalanýyna septigin tıgizetin baspaldaq. Al balanyń qarym-qabileti, óner-ónegesi mektep qabyrǵasynda júrgen kezden-aq baıqalady. Talabymen, talantymen talaıdy tánti etip júrgen Indıra Qojantaıdyń ónerge degen súıispenshiligi erekshe. О́ner dese ishken asyn jerge qoıatyn ol bolashaǵynan kóp úmit kúttiredi. Indıra búgingi kúni Ulytaý aýdanyna qarasty № 9 Terisaqqan orta mektebiniń 6-synyp oqýshysy. Ándi áýeletip shyrqaıtyn án­shi qyzymyz mektebimizdiń maq­tanyshyna aı­nalǵan. Aıadaı bilim uıasynyń jaq­sy atyn shyǵaryp, abyroıyn asqaqtatyp otyr. Osydan úsh jyl buryn Indıra aýdandyq «Ánshi balapan» baıqaýynyń bas júldesin jeńip alyp, I dárejeli dıplommen marapattaldy. Byltyr Almaty qalasynda ót­ken VI halyqaralyq «Ǵumyr darııa» án-bı baı­qaýynda  «Es­tradalyq vokal» nomınasııasy boıynsha I dıp­lomǵa ıe boldy. Jýyrda ǵa­­na Qa­zaq­­­­stan Res­pýblıkasy kishi Ǵy­lym aka­de­mııa­sy­nyń Qa­raǵandy qa­la­synda bol­ǵan 45-shi ǵylymı-praktıkalyq  konferensııa­syn­da da ozyqtar qatarynan tabyldy. Oqý men ónerdi qatar ushtas­tyra bilgen Indıra ár iske jaýap­kershilikpen qaraıdy. Qazaqtyń qyzyna tán jaqsy qasıetter onyń boıynda kóp. Mektebimizde 57 bala bilim alýda. Solardyń biri –  Indıra. Ol ánshilik óner ájesinen daryǵanyn maqtanyshpen aıtady. «Bul óner maǵan ájem Sábıra Ǵaly­qyzynan daryǵan bolar. Ájem syzyltyp án shyrqaǵanda kópshilik súısinip tyndaıdy eken. Al esepke beıimdiligim  atamnan berilgen bolar. Atam soǵys ardageri. Ol kisiniń kóptegen orden, medaldaryn kózdiń qarashyǵyndaı saqtap otyrmyz. Atammen maqtanamyz da» deıdi Indıra. Aıǵanym Beısembaeva, №9 Terisaqqan orta mektebiniń bastaýysh synyp muǵalimi. Qaraǵandy oblysy.