«Torǵaı – Yrǵyz» baǵytynyń mańyzdylyǵy eskerilse

«Nurly Jol» baǵdarlamasy búgingi álemdik daǵdarys kezeńinde qarqyndy damyp kele jatqan el ekonomıkasynyń tejelmeýine, qaıta damýdyń sol deńgeıde saqtalýyna, onyń ústine jańa jumys oryndarynyń ashylýyna barlyq múmkindikterdi týdyryp otyr. «Nurly Jol» Jańa Ekonomıkalyq Saıasaty – elimizdiń ýaqytsha bolsa da kúrmeýi qıyn ýaqyttardan qysylmaı, jańa bıik belesterge qulash sermeýdiń bekem baǵdarlamasy. Elbasymyz naqty kórsetip bergendeı, jańa syn-qaterlerden shyǵý joldary. Jol – el ekonomıkasynyń jandy kúretamyryndaı. Temir­jol, tasjol, ne áýe joly bolsyn eldiń áleýetin arttyrady. Damyǵan elder ekonomıkany kúsheıtýge bet alǵanda jol máse­lesin alǵa shyǵaryp, sony sheshýden bastaıdy. Shalǵaı óńir, shet aımaqtardyń ekonomıkalyq baılanystaryn, saýda-sattyǵyn kúsheıtý arqyly, birtutas damýǵa jol ashady. El gazeti «Egemen Qazaqstannyń» 26 aqpandaǵy «Kózqaras» aıdarymen berilgen «Tasjol taǵdyry» atty maqala bizdiń de kóńilimizdi aýdardy, oıǵa jeteledi. О́ıtkeni, mıllıondap qomaqty qarjy jumsalatyn jobalardyń el ekonomıkasy úshin óte tıimdi jumys isteýi basty shart. «Torǵaıdan – Yrǵyzǵa baratyn jol ári qaraı Shalqar, odan ári Beıneý arqyly Aqtaýǵa týra asyp keledi. Nege ekeni belgisiz, ázirge osy baǵyt eshkimniń esine túser emes. Temirjolmen qatar salynǵan avtojoldyń strategııalyq mańy­zyn da umytpaýymyz kerek emes pe?» deıdi avtor. Jáne de osy baǵyttyń tıimdiligin dáleldep kór­setken aıǵaqtary kim-kim de qulaq qoıardaı. Jol máselesi – eldiń máselesi. Jol máselesi – halyqtyń áleýmettik ómiriniń de jańǵyrýynyń máselesi. Iá, eń ózekti máselelerdiń biregeıi. Tıisti salanyń bilikti mamandary, ǵalymdar, jalpy jurtshylyq tarapynan bildirilgen dáleldi usynystardy, ustanymdy, pikirlerdi eskere otyrsa, durys sheshimder shyǵarylatyny aıdan anyq. Maqalada avtor jazyp, tıimdiligin jan-jaqty naqty dáleldep otyrǵan. «Torǵaı – Yrǵyz» avtokólik joly, shynymen de, osy aımaq turǵyndary úshin birden-bir durys tabylǵan nusqa dep bilemiz. Elordamyz Astanadan Qazaqstannyń tórt tarapyna taraıtyn uly avto­joldardyń bir basty baǵyty – Kaspıı jaǵalaýyndaǵy Aqtaý. Al osy «Torǵaı – Yrǵyz» joly osy úlken avtojoldyń mańyzdy bóligi retinde qaı jaǵynan da utymdy shyǵary sózsiz. Júzdegen shaqyrymǵa joldyń qysqarýy, ekinshi jaǵynan qarjynyń únemdeýge de áseri tıedi. Yrǵyz – elimizdiń arǵy-bergi tarıhynda ózindik orny bar eldi meken. Sońǵy ǵasyrda negizgi temirjoldardan alshaq ornalasýyna baılanysty bul óńirdiń damýy kenjelep, turǵyndar sanynyń da óspeı, demografııalyq jaǵynan tejelip turǵany aqıqat. Al shyn máninde Yrǵyz Qazaqstannyń ortalyǵy, ońtústigi, batysynyń kindigindeı bolyp turǵan jer. Sondyqtan osy tasjoldar «Batys Qytaı – Batys Eýropa» tasjolymen qıylysqan jaǵdaıda aýdannyń strategııalyq mańyzy da ózinen-ózi kóterilip shyǵa keledi. Taǵy bir dáıegi az pikirlerde aıtylyp júrgendeı, Torǵaıdan shyqqan jol Qarabutaq arqyly ketken jaǵdaıda joldyń bir búıirde, tek Aqtóbe oblysy úshin ǵana mańyzy joǵary bolatyny belgili bolyp otyr. Al «Torǵaı – Yrǵyz» baǵyty qalaı bolǵanda da Mańǵystaý, Atyraý oblystaryna júk jetkizý múmkindikterin, Aqtaý arqyly ońtústik baǵyttaǵy elderge shyǵýǵa týra bolatyny sózsiz. Ekinshi jaǵynan, bul jol kórshi Qyzylorda oblysy úshin de óte tıimdi bolyp shyǵady. Al Qyzylorda oblysy keshe ǵana Prezıdentimiz Nursultan Nazarbaev atap ótkendeı, el táýel­sizdik alǵannan beri jedel da­myp kele jatqan perspektıva­ly aımaq. Jáne bolashaǵy zor oblysqa aınalýda. Ekonomıka ósken saıyn júk tasymaly, árıne, artyp otyrady. Iá, Elbasynyń «Nurly Jol» saıasaty búkil halqymyz úshin der kezinde qolǵa alynǵan bastama. Endi, osy mańyzy zor bastamanyń halqymyz nátıjelerin kórip sezinýi tıis. Sodan da bizder «Torǵaı – Yrǵyz» tasjoly­nyń sa­lyn­ýyna úlken úmitpen qaraımyz.  Kólbaı DANABAI, Aral aýdandyq máslıhatynyń hatshysy, Kishkene AIBOSYNOV, Aral aýdandyq ardagerler keńesiniń tóraǵasy. Qyzylorda oblysy