Jany názik Gúlnar

«... О́zińe sen, ózińdi alyp shyǵar, Eńbegiń men aqylyń eki jaqtap». ABAI. «Ekonomıkanyń túrli salalarynda, ásirese, bilim berý, densaýlyq saqtaý, máde-nıet pen bızneste jumyspen qamtylǵandardyń 52%-ynan astamyn áıelder quraıdy. Olar depýtattardyń, basshylardyń arasynda da kóp, al memlekettik qyzmetshilerdiń teń jartysynan astamy – áıelder. Osylaısha, olar kóptegen sheshimderdi qabyldaýǵa atsalysady», degen edi Elbasy Nursultan Nazarbaev. Shynynda elimizdiń órken jaıýy­na áıelderdiń qosyp otyrǵan úlesi mol. Qaı salany alsań da qaıyspaı eńbek etken azamatshalardy kórip dán rıza bolasyń. Ol da úlken otbasynyń shańyraǵynan túlep ushqan túlek bolatyn. Zerek aqyly qaısar mi­ne­zimen ushtasyp jatatyn. Bala bolsa da pikiri úshin tik turyp, kúrese biletin. Jansaraıy rýha­nı turǵydan óte baı bul shańy­raq perzentine jastaıynan eń jaqsy qasıet – bilimge degen qush­tarlyqty, tapsyrylǵan jumysqa jaýapkershilik sezimin sińirdi. Ákesi Nura óńirine ǵana emes, Qaraǵandyǵa tanymal, joq-jitikke kórsetken qaıyrymdylyǵymen, jasaǵan jaqsylyǵymen, mineziniń kórkemdigimen, adamgershilik qa­sıetterimen jurtyna qadirli el azamaty, bilikti basshy, kási­bı uıymdastyrýshy Smaǵul Muqa­nov bolsa, anasy Kúlshat Muha­medııaqyzy irgesi myqty, bosaǵasy berik kópbalaly otbasynyń tut­qa­syna aınalyp, qut-bereke daryt­qan, yrys, baqyt ákelgen aq mańdaı ana. Onjyldyqty bitirisimen Qaraǵandy memlekettik ýnı­ver­sıtetiniń ekonomıka fakýltetine oqýǵa túsip, kún-tún demeı bilimin ushtady. Sóıtip, qarjy salasynyń mamandyǵyn ıgerip, týǵan elge oraldy. Alǵashqy eńbek jolyn Nura aýdandyq qarjy bóliminde maman bolyp bastady. Arman-maqsaty zor adam ómir boıy bir ornynda turaqtap qalmaıdy. Kóp uzamaı ony aýdandyq salyq komıtetine qyzmetke shaqyrdy. Jas mamannyń erekshe qasıet­terin baıqaǵan basshylyq ony 1998 jyly basshynyń orynbasary etip taǵaıyndady. Sodan beri Gúlnar bul qyzmetti bar yntasymen adal atqaryp keledi. Onyń basqarýshylyq qabileti bilim ordasynda júrgende-aq anyq baıqala bastaǵan edi. Basqarý jumysynda, málimetterdi este saqtaýdy, ony oıda ushqyr qorytyp, júıege keltirýdi, sóıtip, tez arada shuǵyl sheshimderdi qabyldaýdy qajet etetini belgili. Ásirese, ol jas ma­mandarǵa kómek kórsetip, olardyń kásibı shyńdalýyna erekshe nazar aýdarady. Onyń qol astynan qanshama jas maman qanattanyp sanaly ómirge joldama aldy deseńizshi. Bıýdjetke salyq jáne basqa da túsimderdiń tolyq jáne mezgilimen túsýin qamtamasyz etetin organ – salyq mekemesi. Olardyń sapaly jumysynyń nátıjesinde jalaqy men zeınetaqynyń der kezinde tólenýleri qamtamasyz etiledi. Salyq zańnamasy kópsalany qamtıtyn, ári zaman talabyna saı jıi ózgeristerge ushyraıtyn sala. Al aýyl kásipkerleri men sharýa qojalyqtary basshylaryna bul ózgerister der kezinde jete bermeıdi. Árıne, salyq organdary tarapynan ártúrli semınarlar ótkizilgenmen, ár­túrli suraqtar boıynsha, naqty jeke tulǵalardyń múlik, kólik salyǵy, patent esep-qısabyn, ońaılatylǵan deklarasııany, memlekettik qyzmetkerler úshin deklarasııany toltyrý sııaqty irili-usaqty máseleler boıynsha suraqtar týyndap otyrady. Sol kezde Gúlnardyń esine ákesiniń aıtqany túsedi: «Balam, aldyńa kelgen adamǵa qol ushyńdy berýge ázir bol. Ol seniń aldyńa erikkeninen kelmeıdi, kómegińe muqtaj bolyp keledi» deıtin únemi. Mine, ákeniń osy sózi Gúlnardy qandaı shyrǵalań shaqtarda da, keıde kóńili qulazyp oıǵa batqanda da tapjylmaıtyn temirqazyqtaı ómir degen tylsymnyń buralań joldarynda adastyrmaı alǵa bastap keledi. Gúlnardyń búkil ómirin, qala berdi kúndelikti tynys-tirshiligin, júris-turysyn mándi de sándi dep nyq senimmen aıtýǵa bolady. О́ıtkeni, osy bir ezýinen árkez kúlki ketpeıtin tynymsyz jan qashan da izdenis pen ilgerileý ústinde. Bárine úlgerip, bárine de úlgi kórsetýde. Ne istese de, qushtarlyqpen isteıdi. Búkil sanaly ǵumyryn memlekettik qyzmetke arnaǵan, eli úshin adal qyzmet etip júrgen, kıeli Nura jerinde týyp-ósken Gúlnar týǵan jeriniń eń qymbat qasıetterin óz tulǵasyna jınaǵan. Onyń «memleketke qyzmet – elge qyzmet» degen kópjyldyq eńbegi baǵalanyp, oblys ákiminiń, respýblıkalyq, oblystyq salyq organdarynyń Qurmet gramotalarymen marapattaldy. Al 2010 jyly «Qazaqstan Respýblıkasy Salyq isiniń úzdigi» ataǵy berilip, omyraýy­na arnaıy tósbelgi taǵyldy. Sharshap-shaldyǵýdy bilmeıtin, jany názik, minezi qaısar Gúlnar Muqanova, mine, osyndaı jan. Bıken AHMETOVA, Qazaqstan Jýrnalıster odaǵynyń múshesi. Qaraǵandy oblysy.