Iltıpat

«Ustazdyq etken jalyqpas úıretýden balaǵa» dep uly Abaı aıtqandaı, ortańǵy toptyń tárbıeshisi Gúlbahar Kádenovanyń erekshe qasıetteriniń biri – izdenis. Jańalyqtarǵa jany qumar ustaz tek otandyq pedagogıkanyń jańa jetistikterimen ǵana shektelip qoımaı, ózge elderdiń de ozyq tájirıbesin zerdelep, óz jumysyna beıimdep, sheber paıdalanady. Ol únemi óz bilimin jetildirip, kóptegen halyqaralyq, jergilikti semınarlarǵa qatysyp keledi. «Mektepke deıingi tárbıeniń halyqaralyq baǵdarlary», «Montessorıdi taný pedagogıkasy» semınar-trenıngteri, «Jańa standart boıynsha mektep aldy balalaryna bilim berý men tárbıe­leý úrdisin uıymdastyrýdyń jańa tásilderi», «О́zin ózi taný» pániniń qurylymdyq, mazmun­dyq erekshelikteri», «Balapan» baǵdarlamasyn iske asyrýdyń ǵylymı-ádistemelik negizderi», basqa bilim jetildirý semınarlary men kýrstaryna qatysyp, oqyp, bilgenin, kóńilge túıgenin áriptesterimen bólisip, jas býynnyń boıyna sińirip júr. Ustaz memlekettik til saıasatyn júzege asyrýǵa da zor úles qosyp keledi desek, esh artyqtyǵy joq. Balabaqsha búldirshinderiniń basym kópshiligi ana tiline shor­qaqtaý ekeni eshkimge de qupııa emes. Tájirıbeli mamannyń táli­mi arqasynda ul men qyz ana tilimizdiń qaınar bulaǵynan sýsyndap, ádemi, ári jatyq sóılep, tipti úlkender kúnde qoldana bermeıtin tyń sózderdi de aıtyp keletinine ata-analar dán rızamyz. Otandy súıýdi, úlkendi syılaýdy, maqal-mátelder, ánder, óleńder úıretip, boılaryna nebir jaqsy izgi qasıetterdi egýde. Abaı atyndaǵy Almaty mem­lekettik ýnıversıtetin bastaýysh bilim pedagogıkasy men ádistemesi, bastaýysh synyptar muǵalimi mamandyǵy boıynsha támamdaǵan Gúlbahar Kádenova shırek ǵasyr boıyna óskeleń urpaqty bilim nárimen sýsyndatyp, tárbıeleýden esh jalyqqan emes. Ol ózin ózi jetildirip otyrý, kásibı jáne mádenı deńgeıin arttyrý tobyndaǵy sábılerdiń jekelegen qasıetterin qadirleý, olarǵa degen ádildik pen qurmet, óz jumysyna shyǵarmashylyqpen qaraý sııaqty qasıetterimen erek­shelenedi. Ata-analarmen birlese otyryp, tárbıe bólmesin erekshe este­tıkalyq turǵyda jabdyq­taýda da jaqsy sheshimin tapqan. Gúlbahar Sasyqbaıqyzy «Ata-baba dástúri – urpaqqa ónege» – ortańǵy topqa beıimdelgen baǵdarlamany, «Balalardy ına­battylyqqa tárbıeleý» – eresekter tobyna baǵyttalǵan jobany jáne «Balalarǵa ekologııalyq tárbıe berý» taqyrybyndaǵy eresekter úshin jospardy ázirlep, osy jumysynda ózi ǵana sheber qoldanyp qoımaı, áriptesterimen de bólisip keledi. Gúlbahar Kádenovanyń eńbegi, kásibı joǵary biliktiligi men bilimi basshylyq tarapynan eskerilip, birtalaı marapattarǵa da ıe boldy. Mine, osyndaı qarapaıym qa­tardaǵy ustazdyń atqaryp otyrǵan zor eńbegi kóleńkede qalyp qoımaı, kópke tanylyp, jastarǵa ónege bolsa eken degen nıetpen, ata-analar balalarymyzdyń súıikti tárbıeshisi Gúlbahar Ká­denova týraly kópshilikpen oı bólisýdi jón kórdik. Qolǵa qalam alǵandaǵy maqsatym da osyndaı óz isine shyn berilgen, tabıǵatynan ustaz jandar kóp bolsa, óskeleń urpaq tárbıesi jalpy halyqty alańdatpas edi degen ata-ana iltıpatyn ortaǵa salý bolatyn. Sáýle QALILAMBEKOVA, ata-ana. ALMATY.