Atyraý polıseıleri Jaıyqqa batqan zeınetkerdi qutqardy

ATYRAÝ. 2 sáýir. Atyraý oblysynyń ýchaskelik polısııa ınspektorlary Jaıyq ózenine batyp bara jatqan zeınetkerdi qutqaryp qaldy. Bul týraly Atyraý oblystyq ishki ister departamentiniń baspasóz qyzmeti habarlady. Oqys oqıǵa 22 naýryz kúni saǵat 16:30-dar shamasynda Mahambet aýdanynda bolǵan. Aýdan ortalyǵy – Mahambet selosynyń tusynda 64 jastaǵy er adam Jaıyq ózenindegi muz ústimen ótpek bolǵan. Alaıda, muz oıylyp, zeınetker sýǵa bata bastaǵan. Der kezinde áreket etken ýchaskelik polısııa ınspektorlary, polısııa kapıtany Ardaq Doshekenov pen polısııa aǵa leıtenanty Ernar Bısembıev dereý kómek berýge umtylady. Sóıtip, olar sýǵa batyp bara jatqan zeınetkerdiń qolyna qosarlana jarmasyp, ajaldan arashalap qaldy. «Ardaq Doshekenov Alǵa aýylynda, al Ernar Bısembıev Aqjaıyq aýylynda polısııa ınspektory bolyp jumys isteıdi. О́z isterin jaýapkershilikpen atqaryp keledi. Bul joly da olar qorǵansyz jandy qıyndyqtan arashalap, erlikke tán áreketimen daralandy. Sýǵa malshynǵan zeınetkerdi qyzmettik kóligimen aýrýhanaǵa ákelip, alǵashqy kómek kórsetilgen soń úıine jetkizdi», deıdi Atyraý oblystyq ishki ister departamentiniń baspasóz hatshysy Gúlnazıra Muhtarova. Joldasbek Shópeǵul. Derek: Atyraý oblystyq ishki ister departamentiniń baspasóz qyzmeti. Sýret: kazvesti.kz.