Sot Nemsovtyń ólimine kúdikti beseýdi de qamady

ASTANA. 8 naýryz. Búgin Borıs Nemsovtyń óltirilýine kúdikti beseýge bopsalaý jáne qaraqshylyq maqsatynan týǵan jaldamalylyq kásippen kisi óltirýge bardy degen aıyp taǵyldy. Bul týraly NTV telearnasy habarlady. Máskeýdiń Basman soty kúdikti beseýdi de qulyp astyna alýǵa sheshim shyǵardy. Kúdiktiler arasyndaǵy Zaýr Dadaev qana óziniń atalǵan qylmysqa qatysy bar ekenin moıyndady. Al qalǵandary – Hamzat Bahaev, Tamerlan Eskerhanov, Anzor Gýbashev jáne onyń inisi Shagıd ózderiniń eshqandaı kinálary joq ekenin málimdedi. Reseı astanasynyń Kalanchıovskaıa kóshesinde ornalasqan Basman soty ǵımaratyna tańerteń qaýipsizdik sharalary jasala bastady. Buǵan jaqyn terrıtorııada polısııa jasaǵy kezekshilikte júr, al ádette avtozak kirip-shyǵatyn sot úıiniń aýlasy qorshaýǵa alynǵan. Kúdiktiler sotqa jedel mashınalardyń qalqalaýymen eki mınıvenamen jetkizildi. Saǵat 12-ge qaraı jumys oryndaryna sýdıalar keldi. Sál keıin tergeý komıtetiniń resmı ókili Vladımır Markın Twitter-inde bes fıgýranttyń da sotta bolatynyn jazdy. Otyrys eki zalda qatar ótkizildi. Zaldardyń birinde tergeýshiler ótken túnde Máskeý mańyndaǵy Odınsovo aýdanynda qolǵa túsken Hamzat Bahaev pen Tamerlan Eskerhanov, sondaı-aq Shagıd Gýbashev úsheýin birdeı qamaýǵa alýdy talap etti. Olardyń bári ózderin qamaýǵa almaýdy ótindi. Eskerhanov muny alıbıi bar ekenimen túsindirdi. Onyń qaraýynda alty balasy bar kórinedi, endi áıeli jetinshisin týǵaly otyr. Shagıd Gýbashev densaýlyǵynda problema bar ekenin, asqazan jarasymen jáne gemorroımen aýyratynyn alǵa tartty, Biraq sot bostandyqqa jiberilse, bulardyń qaı-qaısysy da qaıtyp ustatpaı ketýi múmkin jáne tergeýge qysym jasaıdy degen toqtamǵa keldi. Sýdıa sonymen birge bulardyń segiz jyldan ómir boıy otyrýǵa deıin jaza alýǵa jatatyn asa aýyr qylmys boıynsha aıyptalyp otyrǵanyn eske aldy. Sondyqtan úsheýin de eki aı qamaýǵa qaýly qabyldandy. Kórshi zalda Gýbashevtiń úlkeni – Anzordyń máselesi qaraldy. Sot munda da tergeýshilerdiń ýájderimen kelisti. Ol aıyptalýshy retinde qulyp astynda qala beredi. «Al besinshi kúdikti Zaýr Dadaev jýrnalısterdiń kózinshe kóp sóılegen joq», - dedi NTV tilshisi NTV Vladımır Kobıakov. Qaýlyny oqyp bergen sýdıa aıyptalýshynyń tergeýge bergen kórsetiliminde Borıs Nemsovtyń ólimine qatysy bar ekenin moıyndaǵanyn málimdedi. Dadaev ýaqytsha oqshaýlaǵyshta 28 sáýirge deıin otyrady. Murat Aıtqoja. Derek, sýret: NTV.