«Islam memleketi» Sırııanyń Palmıra qalasyn basyp aldy

«Islam memleketi» lańkestik toby Sırııanyń Palmıra qalasyn basyp aldy. Bul týraly euronews.com habarlady. Sırııa áskeri «Islam memleketi» qarýly jasaǵynyń shabýylyna toıtarys bere almaı, Palmıra qalasyn tastap ketýge májbúr boldy. Qala úshin keskilesken urys birneshe kúnge sozyldy. Baqylaýshylar Palmıra qalasynyń eshqandaı strategııalyq mańyzǵa ıe emes ekenin aıtqan edi. Degenmen, olar lańkestik top mundaǵy sırek kezdesetin tarıhı eskertkishterdi joıyp jiberedi dep qaýiptendi. Sırııa bıligi qaladan júzdegen kóne eskertkishti alyp shyqqan. Alaıda, eskertkish-músinderdiń birazyn shyǵarý múmkin bolmaı tur. Kóne jádigerler jónindegi Sırııa mamandary bul jaǵdaıǵa halyqaralyq qaýymdastyqtyń aralasýyn surap otyr. «Bul – halyqaralyq soǵys. Eger «Islam memleketi» lańkestik toby jeńiske jetse, ol Sırııa halqynyń ǵana jeńilisi bolyp sanalmaıdy. Bul Amerıka, Qytaı, Fransııa, Ulybrıtanııa, Reseı, Birikken Ulttar Uıymy Qaýipsizdik keńesiniń turaqty músheleri men búkil halyqaralyq qaýymdastyqtyń da jeńilisi», – deıdi kópke úndeý tastaǵan jergilikti mamandar. Palmıra – IýNESKO-nyń tarıhı muralar tizimine engen qala. Kóne shahar ataýy týraly alǵashqy derekter bizdiń dáýirimizge deıingi ekinshi myńjyldyqtarda kezdesedi. Qaqtyǵys bastalmaı turǵanda qala Sırııadaǵy eń basty týrıstik ortalyqtyń biri sanalǵan edi. Soǵys saldarynan mundaǵy tarıhı eskertkishter qatty zaqymdandy. Endi kóne qalaǵa joıylyp ketý qaýpi tónip tur. Elaman Qońyr. Derek: euronews.com. Sýret: ria.ru.