Prezıdenttikke taǵy bir úmitker synaqtan óte almady

ASTANA. 9 naýryz. Burnaǵy kúni Ortalyq saılaý komıssııasynda Prezıdenttikke úmitker Qanat Toqtaruly Jumannyń memlekettik tildi erkin meńgergendigin anyqtaý jónindegi lıngvıstıkalyq komıssııanyń otyrysy boldy. Bul týraly «QazAqparat» habarlady. Alynǵan emtıhan nátıjeleri boıynsha, lıngvıstıkalyq komıssııa ashyq daýys berý arqyly kópshilik daýyspen Prezıdenttikke kandıdat Qanat Jumannyń memlekettik tildi erkin meńgermegeni týraly sheshim qabyldady. Komıssııa tóraǵasy Myrzataı Joldasbekov birinshi jazbasha tapsyrmada kandıdat ózi tańdaǵan «Meniń elim - meniń jerim» taqyrybyn asha almaǵanyn, oıyn naqty jáne júıeli jetkize bilmegenin aıtty. «Jalpy, kandıdat 31 orfografııalyq, stılıstıkalyq jáne pýnktýasııalyq qate jiberdi. Ekinshi tapsyrma boıynsha, Abaı Qunanbaıulynyń óleńin oqý kezinde birqatar orfoepııalyq normany buzǵandyqtan, oqylǵan úzindi maǵynasynyń qabyldanýyn qıyndatty jáne daýys yrǵaǵyna salyp, mánerlep oqı almady», - dedi Joldasbekov. Sonymen qatar Qanat Juman qazaq tilinde birde-bir poezııalyq týyndyny jatqa aıtyp bere almaǵan. Úshinshi tapsyrma boıynsha, komıssııa belgilegen kópshiliktiń aldynda 15 mınýt ornyna 5 mınýt qana sóılegen, onda da óz oıyn baılanysty, júıeli jáne qısyndy túrde erkin jetkize almaǵan. «Ádebı til normalarynan jurdaı jáne sózdik qory az. Nátıjesinde lıngvıstıkalyq komıssııa úmitker memlekettik tildi erkin meńgermegen dep biraýyzdan sheshim qabyldady», - dep atap ótti komıssııa tóraǵasy. Murat Aıtqoja. Derek, sýret: «QazAqparat».