Petropavl. 2 sáýir. “Astana EKSPO-2017” UK men oblys ákimdigi arasyndaǵy yntymaqtastyq týraly memorandým aıasynda eki jel energııasy qondyrǵysy Qyzyljar aýdanyna qarasty «Zenchenko jáne K» komandıttik seriktestiginde paıdalanýǵa berildi. Bul týraly Soltústik Qazaqstan oblysy ákimdiginiń baspasóz qyzmeti habarlady.
Elbasynyń elimizdi “jasyl ekonomıkaǵa” kóshirý jónindegi tapsyrmasyn júzege asyrý maqsatymen “Zenchenko jáne K” KS 2012 jyly jalpy qýattylyǵy 1,5 megavatty quraıtyn eki jel energııasy qondyrǵysyn iske qosqan edi. Sodan bergi eki jylda 4 mln. kVt/saǵattan artyq elektr qýaty óndirilgen.
Árqaısysynyń qýaty 1 megavatt, jalpy quny 1 mıllıon eýro turatyn jel energııasy qondyrǵylaryn iske qosý saltanatyna oblys ákimi Erik Sultanov qatysyp, joba Indýstrııalandyrý kartasynyń ekinshi besjyldyǵy sheńberinde júzege asqanyn, aldaǵy ýaqytta mundaı qondyrǵylar kóbeıe túsetinin jetkizdi.
«Osydan eki jyl buryn bastalǵan jobanyń ekinshi kezegin iske qosý arqyly qondyrǵylardyń jalpy qýattylyǵy 3,5 megavattqa jetip otyr. Tıimdiligi aıtarlyqtaı: elektr qýaty shyǵynyn aı saıyn 6,3 mıllıon. teńgege qysqartýǵa múmkindik beredi. Memleket basshysynyń ıdeıasyn óńirimizde birinshi bolyp oryndaýshylar qataryndamyz,– deıdi Qazaqstannyń Eńbek Eri, seriktestiktiń bas dırektory Gennadıı Zenchenko.
Atalmysh joba 2017 jyly elordamyz Astanada ótetin Halyqaralyq mamandandyrylǵan “EKSPO” kórmesi qarsańynda balamaly energııa kózin paıdalanýdaǵy ekonomıkalyq, ekologııalyq mańyzdy qadam sanalary anyq.
О́mir Esqalı.
Derek: Soltústik Qazaqstan oblysy ákimdiginiń baspasóz qyzmeti
Sýret: Soltústik Qazaqstan oblysy ákimdiginiń baspasóz qyzmeti.
