Petropavl. 2 sáýir. Dýbaıda ornalasqan Birikken Arab Ámirligindegi iri azyq-túlik jelileriniń biri «LuLu» sýpermarketinde Qazaqstan Respýblıkasynyń elshiligi Prezıdent N. Nazarbaevtyń otandyq ónimderdi nasıhattaý jónindegi bastamasyna oraı «Qazaqstanda jasalǵan» roýd-shoýyn uıymdastyrdy. Ondaǵy tanystyrylymda Soltústik Qazaqstan oblysy taýar óndirýshileriniń azyq-túlik ónimderi zor qyzyǵýshylyq týdyrdy. Bul týraly oblystyq ákimdiktiń baspasóz qyzmeti habarlady.
Aımaq basshysynyń birinshi orynbasary Aıdarbek Saparov jetekshilik etken delegasııa quramyna tamaq ónerkásibi salasynda syrtqy eksportqa shyǵyp júrgen «Sultan», «Sút», Mýkomol», «Drýjba», «Perspektıva» sekildi jetekshi sharýashylyqtar ókilderi enip, ekspozısııanyń iri aýmaǵyn ıelendi. Sýpermarketke kelýshiler tarapynan sórelerge qoıylǵan azyq-túlik túrlerine, onyń ishinde, makaron, un, bal ónimderine suranys mol bolyp, sapalylyǵymen, baǵanyń qoljetimdiligimen erekshelendi. «Soltústikqazaqstandyq delegasııa 29 naýryzda issaparmen BAÁ-ne attanǵan bolatyn. 3 sáýirge deıin «Qazaqstanda jasalǵan» aksııasyna, «roýd-shoý» sharasyna qatysyp, isker ókildermen kezdesedi. Ondaǵy maqsat–gıpermarketter jelisi basshylarymen kelissóz júrgizip, BAÁ men Taıaý Shyǵystaǵy elder naryǵyna qazaqstandyq ónimderdi satý máselesin qarastyrý. Bizge jetken aqparattar boıynsha aksııanyń joǵary deńgeıde ótkeni , shetel kásipkerleriniń bizdiń ónimderge úlken qyzyǵýshylyq tanytqany baıqalady.»,– deıdi oblystyq aýyl sharýashylyǵy basqarmasy basshysynyń orynbasary Janar Musaqulova. О́mir Esqalı. Derek: Soltústik Qazaqstan oblysy ákimdiginiń baspasóz qyzmeti Sýret: Soltústik Qazaqstan oblysy ákimdiginiń baspasóz qyzmeti.
