ASTANA. 9 naýryz. «Rosbalt» málimdegendeı, Borıs Nemsovty óltirdi degen aıyp taǵylyp otyrǵan «Sever» batalony polky komandıriniń burynǵy orynbasary Zaýr Dadaev «saıasatkerdiń musylmandar men olardyń dinderi týraly birneshe ret jaǵymsyz sózder aıtýy qylmystyń sebebi bolǵanyn jetkizdi. Bul týraly «Kommersant» habarlady.
Nemsovtyń osyndaı sózder aıtyp júrgenin Dadaev 2015 jylǵy qańtarda estigesin, «qatty dindar» adam retinde shydamaı ketip, kek qaıtarǵan. Basylymnyń quqyq qorǵaý organdaryndaǵy mánbesiniń málimetinshe, «Dadaev is júzinde óziniń osy qylmysty uıymdastyrýshy ekenin moıyndap ta qoıǵan».
Quqyq qorǵaý organdarynda mánbeniń «Rosbaltqa» habarlaǵanyndaı, «Sever» batalony polky komandıriniń burynǵy orynbasary Zaýr Dadaev óziniń Borıs Nemsovty óltirýdi uıymdastyrýshy ekenin is júzinde moıyndap qoıǵan. Qylmystyń sebebi retinde Nemsov myrzanyń Reseı terrıtorııasynda turatyn musylmandar, Muhammed paıǵambar, sondaı-aq ıslam dini tarapynda birneshe ret jaǵymsyz pikirler bildirgeni ataldy. Muny 2015 jyldyń qańtarynda bilgen Dadaev kek qaıtarýǵa bekinedi.
Basylymnyń aqparynsha, oppozısıonerdi óltirýge qatystary bar dep aıyp taǵylyp otyrǵan qalǵan tórteýdi Dadaev Máskeýdiń irgesinde turatyn bolǵandyqtarynan qalany jaqsy biletindikteri úshin qylmysty uıymdastyrýǵa tartqan bolyp shyqty. «Dadaev is júzinde bul qylmysty uıymdastyrǵanyn moıyndady, - dep habarlady «Rosbalt» mánbesi. – Sondyqtan tergeý sheńberinen áldeqandaı bir jurtty dúr silkindiretin áshkereleýdi nemese taǵy bireýlerdi qamaýǵa alýdy kútýdiń qajeti joq».
Eske sala keteıik, Máskeýdiń Basman soty 8 naýryz kúni Zaýr Dadaevty 28 sáýirge deıin qamaýǵa alǵan bolatyn. Sol kezde-aq aıyptalýshy Dadaevtyń qylmysqa qatysy baryn moıyndaǵany belgili bolǵan. Onymen birge aǵaıyndy Anzor jáne Shagıd Gýbashevter, Tamerlan Eskerhanov jáne Hamzat Bahaev qamaýǵa alyndy. Olar da Borıs Nemsovty óltirý jónindegi qylmystyń istiń fıgýranttary bolyp sanaldy. Taǵy bir kúdikti – Groznyı qalasynyń 30 jasar turǵyny Beslan Shavanov munyń aldynda polıseılermen atys kezinde ózi jarǵan granatadan qaza tapty.
Reseıdiń RPS-PARNAS partııasynyń teń tóraǵasy jáne Iаroslavl oblystyq dýmasynyń depatýtaty Borıs Nemsov 28 aqpan kúni túnde Máskeýdiń ortalyǵynda, Úlken Moskvoresk kópiri ústinde óltirilgen edi. Tergeý men bılik belgili saıasatkerdiń ólimin birden tapsyryspen jasalǵan degen qorytyndyǵa kelgen. Sonymen birge, tergeýshiler qylmysty jasaýshylardyń óz isiniń kásibıleri emes ekenin de málimdegen. Buǵan quqyq qorǵaýshylar dálel retinde kıllerlerdiń budan jıyrma jyl burynǵy oqty paıdalanýlary men Borıs Nemsovtyń janyndaǵy basty kýáger - ýkraın fotomodeli Anna Dýrıskaıany tiri qaldyrýlaryn keltirgen edi.
Murat Aıtqoja.
Derek, sýret: Kommersant.
