Qyzylordalyq maman eńbek sińirgen jattyqtyrýshy atandy

ASTANA. 2 sáýir. Qazaqstan Respýblıkasynyń Mádenıet jáne sport mınıstrligi sport jáne dene shynyqtyrý komıtetiniń tóraǵasy Elsııar Qanaǵatovtyń buıryǵymen Qyzylorda oblysy Qarmaqshy aýdanynyń týmasy Bolatbek Keneevke qazaq kúresinen «Qazaqstan Respýblıkasynyń eńbek sińirgen jattyqtyrýshysy» ataǵy berildi. Bul týraly egemen.kz habarlady. Bolatbek Jaqsylyquly uzaq jyl shákirt tárbıelep, ulttyq sportymyzdyń damýyna súbeli úles qosqan bilikti maman. Sondaı-aq, qazaq kúresinen álem chempıony Ǵalymjan Ábdirahmanovtyń jeke jattyqtyrýshysy ekenin aıta keteıik. Búginde ol Qyzylorda oblystyq sportta daryndy balalarǵa arnalǵan J.Bahadúr atyndaǵy mektep-ınternatynda qyzmet isteıdi. Qazaq balalaryn sportqa baýlyǵan ol áli talaı álem chempıonyn shyǵarsam deıdi. Shyn talantty aýyldan izdep, óńir sportynyń órkendeýine eńbek etip júrgen jattyqtyrýshyǵa aldaǵy ýaqytta tek sáttilik tileımiz. Elaman Qońyr. Derek, sýret: egemen.kz.