Wi-Fi Bus Astana

Endi Astana turǵyn­dary men qonaq­­tary qoǵamdyq kólik­ter­de tegin ınternetke qosyla alady. Osy maqsatta qolǵa alyn­ǵan joba aıasyn­­­­­­­­da 400 avtobýs ǵalam­­tormen jabdyq­taldy.  Uıymdas­ty­rýshylar shildeniń sońyna deıin qaladaǵy barlyq avtobýs parkin osyndaı jelimen qam­týdy jos­parlap otyr. Jobany Astana qalasy ákimdiginiń qoldaýymen «Beeline Qazaqstan» kompanııasy júzege asyrdy. Sondaı-aq, «Astana Innovations» ınnovasııalyq damý operatory men «Astana LRT» elordanyń kólik ınfra­qurylymyn damytý operatory tyń bastamanyń senimdi seriktesteri bolyp tabylady. Jalpy, bul jumys Elba­sy­nyń Astanany álemdegi 50 aqyldy qalanyń qataryna qosý týraly tapsyrmasyna sáı­kes jasalyp otyr. Soǵan oraı elordanyń kólik júıesin keshen­di túrde jańǵyrtý isi qar­qyn­dy júrgizilýde. Bul rette, eń aldymen, halyq úshin qolaıly jaǵdaı týǵyzý kózdelgen. «Beeline Qazaqstan» kom­pa­nııasynyń atqarýshy dırektory Taras Parhomenkonyń aıtýynsha, ár avtobýsta bir mezette 15-20 adam ǵalamtorǵa qosyla ala­dy. Bir seansy 15 mınýttan tura­dy. Sondaı-aq, ol alǵashqy sát­ten-aq halyqtyń jobaǵa erekshe qy­zyǵýshylyq tanytqanyn aıtty. – Jeliniń jyldamdyǵy sekýndyna 1,5-ten 10 megabaıtqa deıin jetedi. Joba qosylǵannan keıin birneshe saǵattyń ishinde avtobýstardaǵy ınternetti 300-den astam adam paıdalanady. Sol ýaqyttyń ishinde olar 2,5 gıgabaıt trafıkti paıdalanyp úlgergen, – dedi T.Parhomenko. Aıta keteıik, WI-FI Bus jobasy Qazaqstanda 2013 jyly qolǵa alyndy. Sodan beri Al­maty, Qaraǵandy, Qyzylorda, Qostanaı, Petropavl, Túrkistan, Oral jáne Kókshetaý qalalarynda 200-ge jýyq qoǵamdyq kólik te­gin ınternetpen qamtyldy. Al As­tana bul qatarǵa elimizdegi to­ǵyzynshy qala bolyp tirkeldi. Elaman QOŃYR, «Egemen Qazaqstan».