Semeıdegi gematologııa ortalyǵynyń qurylysyna 1,2 mlrd teńge bólindi

О́SKEMEN. 21 mamyr. KAZ Minerals toby Semeı qalasyndaǵy respýblıkalyq gematologııa ortalyǵynyń qurylysyna 1,2 mlrd teńge bóledi. Bul týraly Shyǵys Qazaqstan oblysynyń aqparattyq ortalyǵyna silteme jasap egemen.kz tilshisi habarlady. Demeýshilik kómek kórsetý týraly memorandýmǵa oblys ákimi Danıal Ahmetov pen KAZ Minerals tobynyń basqarma tóraǵasy Oleg Novachýk qol qoıdy. Atalǵan ortalyq qan júıesi aýrýlaryna dıagnostıka jasaýda jáne emdeýde (onyń ishinde súıek kemigin transplantasııalaý) joǵary tehnologııaly ádisterdi qoldaný arqyly halyqqa qol jetimdi ári sapaly qyzmet kórsetýge múmkindik beredi. Jospar boıynsha bul ortalyq elimizdegi onkogematologııalyq profıl, gemostazdyń buzylýy, anemııa jáne taǵy basqa aýrýlarǵa shaldyqqan qan jáne lımfo júıesi dertteri bar naýqastarǵa medısınalyq kómek kórsetetin biregeı klınıkalyq keshen bolmaq. Jobada ortalyqtyń aýmaǵynda balalarǵa ata-analarymen birge ornalasýǵa múmkindik beretin pansıonat qarastyrylǵan. Ortalyqtyń janynda hımııa terapııanyń aýyr kýrstarynan ótken jáne súıek kemigi transplantasııalanǵan naýqastarǵa qyzmet kórsetetin ońaltý ortalyǵy jumys isteıtin bolady. Sońǵy 5 jylda kompanııa Shyǵys Qazaqstandaǵy túrli áleýmettik nysandardyń qurylysy men jóndeý jumystaryna 5,4 mlrd teńgeden astam qarajat bóldi. Toptyń qarjylandyrýy arqasynda aımaqtaǵy bilim, densaýlyq jáne sport salalary boıynsha ǵımarattar salyndy. Sondaı-aq, KAZ Minerals toby oblystyq aýrýhanany ortopedııalyq jáne travmatologııalyq operasııalarǵa arnalǵan jabdyqtarmen qamtamasyz etti. Dýman Anash. Derek: Shyǵys Qazaqstan oblysynyń aqparattyq ortalyǵy. Sýret: rnpc.kz.