Elbasy AQSh-tyń burynǵy senatory Sem Nanndy qabyldady

ASTANA. 27 tamyz. Memleket basshysy AQSh-tyń burynǵy senatory Sem Nanndy qabyldady. Bul týraly akorda.kz habarlady. Qazaqstan Prezıdenti bul kezdesýdiń Semeı polıgony jabylǵan kún men Birikken Ulttar Uıymy atap ótetin Halyqaralyq ıadrolyq synaqqa qarsy is-qımyl kúni qarsańynda ótýiniń sımvoldyq máni bar ekenine toqtaldy. Elbasy polıgon jabylǵannan bergi jyldar boıy S.Nann elimizge qoldaý kórsetip kelgenin aıtty. «Bul máseleniń tarıhyn sizden artyq eshkim bilmeıdi. Bizder úlken jumys atqardyq dep sanaımyn, ol jumys búgingi kelisimge qol qoıýmen aıaqtalyp otyr. Qazaqstan – dúnıejúzilik antııadrolyq qozǵalystyń bastamashysy ári kóshbasshysy, buǵan onyń moraldyq quqyǵy bar. Men ózim osy máselege arnalǵan barlyq halyqaralyq sammıtterge qatysyp kelemin», – dedi Nursultan Nazarbaev. S.Nann Qazaqstanda az baıytylǵan ýran bankin qurý týraly kelisimge qoıylýynyń mańyzdylyǵyn atap ótti. «Bul – ıadrolyq energııany áskerı maqsatta paıdalanýdan bas tartý úshin barlyq memleketter yntymaqtasatyn bolashaqqa qaraı jasalǵan alǵashqy qadam. Qazaqstan jáne Siz ózińiz bul oraıda árdaıym úlgi kórsetip keldińiz, ózgelerdi sońyńyzdan erttińiz. Sizdiń elińiz bul úshin qandaı qadam jasaǵanyn búkil álem biledi, óıtkeni dál osy jerde ıadrolyq polıgondy jabý týraly sheshim qabyldandy. Qazaqstan ıadrolyq baǵdarlamalarǵa qatysty ne isteý qajettigi týraly árdaıym jaqsy ónege kórsetip keldi», – dedi AQSh-tyń burynǵy senatory. Aıdar О́risbaev. Derek, sýret: akorda.kz.