TARAZ. 3 shilde. Oblys ortalyǵyndaǵy «Jeńis» saıabaǵynda Jambyl oblysy ishki ister departamenti esirtki bıznesine qarsy kúres basqarmasy qyzmetkerleriniń bastamasymen Taraz qalasy ákimdigi ishki saıasat basqarmasynyń «Taraz Jastar ortalyǵy», Jambyl oblystyq salaýatty ómir saltyn qalyptastyrý ortalyǵy jáne «Bir Bolashaq» jastar qoǵamdyq birlestiginiń qoldaýymen «Taraz – nashaqorlyqsyz qala!» atty aksııa ótti. Bul týraly egemen.kz tilshisi habarlady.
«Adamnyń densaýlyǵy – qoǵam baılyǵy. Árbir adam óz densaýlyǵynyń myqty bolýy joldaryn qarastyrady. Otanymyzdyń keleshegi men kórkeıýi ózimizdiń qolymyzda. Salaýatty ómir súrýdiń negizi – jaman ádetterden aýlaq bolý. Al salaýatty ómir súrýge keri yqpal tıgizetin indet – ol nashaqorlyq» deıdi bul jóninde Jambyl oblystyq salaýatty ómir saltyn qalyptastyrý ortalyǵynyń dırektory Gúljan Imanbekova. IID esirtki bıznesine qarsy kúres basqarmasynyń aǵa ınspektory, polısııa podpolkovnıgi Vasılıı Dýbskıı: «Qazirgi ýaqytta nashaqorlyq máselesi álemdik qoǵamdastyqta ózekti bolyp qalýda jáne onyń saldary retinde jastar arasynda esirtkini paıdalanýmen baılanysty ahýal barlyq elder úkimetiniń alańdaýshylyǵyn arttyryp otyr» dedi. Polısııa polkovnıgi nashaqorlyqqa qarsy kúres máselesinde belsendi jumys atqarǵany úshin UQD «Ońtústik - Arylý» qoǵamdyq birlestiginiń basshysy Dáýren Baqjanovty ishki ister mınıstri, polısııa general-maıory Q.Qasymovtyń gramotasymen marapattady. IID EBQKB qyzmetkerleri de bul kúni oljaǵa keneldi, bildeı bes qyzmetkerine ishki saıasat basqarmasynyń alǵys haty tabys etildi.
Saltanatty sharada IID kınologııa ortalyǵy arnaıy daıarlanǵan ıtterdiń kórsetilimi sharaǵa shyraı bergendeı. Aksııa sońynda uıymdastyrýshylar ázirlegen konserttik baǵdarlama jalǵasyn taýyp, barlyq atsalysýshylarǵa «Narkopost» jáne «Esirtkisiz bolashaq» atty jýrnaldary tartyldy.
Oralhan Dáýit.
Derek, sýret: egemen.kz.
