Qazaqstan Respýblıkasynyń Memlekettik hatshysy Gúlshara Ábdiqalyqova Halyqaralyq eńbek uıymynyń Shyǵys Eýropa men Ortalyq Azııa elderindegi О́ńirlik bıýrosynyń dırektory Haıns Kollermen kezdesti. G.Ábdiqalyqova Halyqaralyq eńbek uıymynyń (HEU) BUU júıesindegi eńbek qatynastaryn retteý máseleleri jónindegi halyqaralyq bedeldi uıym retindegi rólin atap ótti. Memlekettik hatshy Qazaqstannyń bul halyqaralyq uıymmen yntymaqtastyqqa aıryqsha mán beretinin jáne HEU-nyń negizgi is-sharalaryna jyl saıyn belsendi túrde qatysatynyn aıtty. Sonyń ishinde bıylǵy maýsymda ótetin HEU Bas konferensııasy 104-sessııasynyń taqyryby mańyzdy ekenine erekshe toqtaldy.
Sonymen qatar, taraptar eńbek qatynastary salasyndaǵy Qazaqstan men HEU yntymaqtastyǵynyń keleshegin talqylady. Memlekettik hatshy Memleket basshysy usynǵan bes ınstıtýttyq reforma memlekettik ınstıtýttardy sapaly jańartýǵa, ekonomıkalyq baǵdarlamalardyń tıimdiligin arttyrýǵa, memlekettik qyzmetter sapasyn jaqsartýǵa jáne keń aýqymdy ınfraqurylymdyq jobalardy júzege asyrýǵa baǵyttalǵanyn atap kórsetti. G.Ábdiqalyqova «Nurly Jol» memlekettik baǵdarlamasy ekonomıkanyń ornyqty ósýin qamtamasyz etý, búgingi jumys oryndaryn saqtaý jáne syrtqy naryqtaǵy ahýaldyń nasharlaýy jaǵdaıynda jańalaryn ashý úshin erekshe mánge ıe ekenin aıtty.
Atalǵan mindetterdi iske asyrý el ekonomıkasyn jandandyrady, ıkemdilikti arttyrady jáne halyqtyń jumyspen qamtylýyn barynsha qamtamasyz ete otyryp, kásipkerlik problemalarynyń sheshilýine múmkindik týǵyzady. Kezdesý barysynda, sonymen birge, Qazaqstanda jastardy jumyspen qamtamasyz etý úshin Ulttyq is-qımyl josparyn qabyldaý, sondaı-aq, Eńbekti qorǵaý jáne jumys kúshiniń ıkemdiligi jóninde zertteý júrgizýdiń ulttyq baǵdaryn ázirleý jóninde HEU-nyń tehnıkalyq qoldaý kórsetýi máseleleri qaraldy. Kezdesý aıasynda jýrnalısterge suhbat bergen Halyqaralyq eńbek uıymynyń Shyǵys Eýropa jáne Ortalyq Azııa elderindegi О́ńirlik bıýrosynyń dırektory H.Koller bıylǵy maýsymda ótetin HEU Bas konferensııasynyń 104-sessııasynda uıymǵa múshe 185 eldiń ókilderi qatysyp, onda bolashaqta eńbek naryǵynda qalyptasatyn jaǵdaılar, eńbekpen qamtý máseleleri qozǵalatynyn jetkizdi. «VIII Astana ekonomıkalyq forýmynda kóteriletin máselelerdiń biri – halyqty eńbekpen qamtý saıasaty. Bul – halyqaralyq qoǵamdastyqtyń kún tártibinde turǵan ózekti másele. Qazirgi tańda álem elderiniń basym kópshiliginde jumyssyzdyq ýshyǵyp tur. Máselen, álemde 200 mln. adam jumyssyz. Bul ótken jylǵy kórsetkishpen salystyrǵanda 30 mln. adamǵa kóp. Demek, bul másele biz úshin aıryqsha mańyzdy, sol sebepti de ol Astana ekonomıkalyq forýmynyń alańynda jan-jaqty talqylanady», – dedi H. Koller.
Láıla EDILQYZY, «Egemen Qazaqstan».
