Beıbit Ystybaev – «Qazaqstan barysy-2015» týrnıriniń jeńimpazy!

ASTANA. 4 shilde. Beıbit Ystybaev – «Qazaqstan barysy-2015» týrnıriniń jeńimpazy! Ol fınalda Qyzylorda oblysynyń palýany Rýslan Ábdirazaqovty jeńdi. Bul týraly egemen.kz habarlady. Fınaldyq beldesýde qarsylastar bir-biriniń osal tusyn izdep, negizinen qorǵanysqa kóp jumys istedi. Sylbyr kúreskeni úshin tóreshiler Rýslanǵa esketý berip, Beıbit búk upaıymen alǵa shyqqan. Alaıda, Rýslan tarazy basyn teńestirýdiń amalyn tapty. Sońǵy sátke deıin jambas upaıyn enshilep úlgergen Beıbit bıylǵy dodanyń jeńimpazy atandy. Al jarystyń qola júldesi astanalyq Ǵanı Seıdildaevqa buıyrdy. Ol qola belbeý úshin bolǵan beldesýde Ońtústik Qazaqstan oblysynyń palýany Jumanazar Ersultanovtan aılasyn asyrdy. Bıyl 5-shi ret ótken týrnırdiń júlde qory 225 000 AQSh dollaryn qurady. Onyń 35 myń dollary jattyqtyrýshylarǵa taǵaıyndalǵan. 1-oryn – 150 myń AQSh dollary; 2-oryn – 30 myń AQSh dollary; 3-oryn – 10 myń AQSh dollary. Bul júldeden bólek jeńimpaz ben júldegerlerge altyn, kúmis jáne qola belbeý tabys etiledi. Sondaı-aq, «Qazaqstan barysy» atanǵan palýan «Altyn taıtuıaqpen» marapattalady. Beıbit Ystybaev 2012 jyly bul týrnırde top jarǵany belgili. Iаǵnı, ol osymen «Qazaqstan barysy» týrnırin ekinshi márte jeńip otyr. Jarys barysymen tolyq myna jerden tanysa alasyzdar. Elaman Qońyr. Derek, sýret: egemen.kz.