Jańaózende jynystyq quldyqtaǵy sheteldik áıelder bosatyldy

AQTAÝ. 22 mamyr. Mańǵystaý oblysy Jańaózen qalasynda jynystyq quldyqtaǵy sheteldik áıelder bosatyldy. Bul týraly lada.kz saıtyna silteme jasap, egemen.kz tilshisi habarlady. Mańǵystaý oblystyq ishki ister departamenti uıymdasqan qylmysqa qarsy kúres basqarmasy qyzmetkerleri Jańaózen qalasynda jynystyq quldyqta bolǵan Qaraqalpaqstan respýblıkasynyń úsh áıelin bosatty. Bul atalǵan departamenttiń 18-22 mamyr aralyǵynda júrgizgen «Nelegal-2015» shuǵyl-aldyn alý sharasy kezinde júzege asyryldy. Mańǵystaýǵa Qaraqalpaqstannan jumys izdep kelgen 3 jas qyz Jańaózen qalasyndaǵy «Araı-2» shaǵyn aýdanynda ornalasqan saýnaǵa jumysqa turady. Saýnada óz jerlesteri, ıaǵnı, 38 jastaǵy qaraqalpaqstandyq áıel olardyń barlyq qujattary men uıaly telefondaryn alyp, «eger shaǵym aıtsa, mıgrasııalyq polısııaǵa tapsyratyndyǵyn» aıtyp qorqytyp, 2 aı boıy eriksiz jynystyq qyzmet kórsetýge jumsaıdy. Bir qyz saýnadan qashyp shyǵyp, ishki ister departamenti uıymdasqan qylmysqa qarsy kúres basqarmasyna shaǵymdanady. Nátıjesinde polıseıler atalǵan saýnaǵa kelip, quldyqtaǵy áıelderdi qutqarady. Mańǵystaý oblystyq ishki ister departamenti baspasóz qyzmetiniń habarlaýynsha, qazirgi tańda oqıǵaǵa oraı Qylmystyq kodekstiń 308 jáne 309-baptary boıynsha qylmystyq is qozǵalyp, tergeý amaldary júrgizilýde. Gúlaıym Shyntemirqyzy. Derek, sýret: lada.kz.