Aq tilekter aǵyny

Qazaqstan Respýblıkasynyń Prezıdenti Nursultan Nazarbaevtyń  týǵan kúnine baılanysty sheteldik memleketter men úkimetter basshylarynan quttyqtaýlar kelip tústi, dep habarlady Prezıdenttiń baspasóz qyzmeti. Reseı Federasııasynyń Prezıdenti Vladımır Pýtınniń quttyqtaýynda Nursultan Nazarbaevtyń Qazaqstanda ǵana emes, syrtqy álemde de zor qurmet pen bedelge ıe ekeni atap ótilgen. «Siz prezıdenttik laýazymda jumys istegen jyldary eldegi tatýlyq pen kelisimdi qamtamasyz etip, zamanaýı demokratııalyq memleket qura aldyńyz. Sizdiń basshylyǵyńyzben respýblıka áleýmettik-ekonomıkalyq jáne ǵylymı-tehnıkalyq progress jolymen senimdi júrip keledi, ózekti halyqaralyq máselelerdi sheshýge belsene qatysady», – delingen quttyqtaýda. V.Pýtın eki eldiń arasyndaǵy odaq­tastyq qarym-qatynastardy jáne stra­tegııalyq seriktestikti damytýǵa Qazaqstan Prezıdentiniń qosqan jeke úlesi barshaǵa málim ekenin atap aıtty. «Siz úshin mereıtoı jylynda Eýra­zııa­lyq ekonomıkalyq odaq týraly ıdeıa­ńyzdyń is júzine asqanyna shynaıy qýa­nyshtymyn. Osynaý aýqymdy jobany odan ári júzege asyrý kópjaqty ynty­maq­tastyqty, búkil Eýrazııa keńisti­gindegi tatý kórshilestikti jáne ózara túsinistikti nyǵaıtýǵa septigin tıgizetinine senimdimin. Bizdiń dostyq, syndarly qatynastarymyzdy joǵary baǵalaımyn jáne Sizben birlesken jumys jalǵasady dep úmittenemin», – dep atap ótti Reseı Pre­zıdenti. Sońynda V.Pýtın Nursultan Nazar­baevqa densaýlyq, uzaq ǵumyr, baqyt, sarqylmas qýat jáne Qazaqstan halqynyń ıgiligi úshin jańa bıikterge jetýin tiledi. * * * Qytaı Halyq Respýblıkasynyń Tór­aǵasy Sı Szınpın Qazaqstan men Qytaı qarym-qatynastary sońǵy jyldary qarqyndy damyp kele jatqanyna nazar aýdarǵan. «Elderimizdiń arasyndaǵy saıası senim de tereńdeı túsip, yntymaqtastyqtyń túrli salalarynda eleýli nátıjeler úshin jaǵdaı týǵyzyp otyr. Sizben birlesip memleketterimizdiń turaqty baılanysyn qamtamasyz etýge, qarym-qatynastardy jańa deńgeıge kóterýge, sondaı-aq Qa­zaqstan men Qytaı arasyndaǵy ekijaqty stra­tegııalyq seriktestikti eki eldiń hal­­­­qy­nyń ıgiligi jolynda keńeıtýge ázir eke­­nim­di bildiremin», – delingen qut­tyq­taýda. Sı Szınpın, sondaı-aq, ShYU-nyń Ýfada ótetin aldaǵy sammıtindegi kez­desýdi taǵatsyzdana kútetinin atap ótken. QHR Tóraǵasy Nursultan Nazarbaevqa myqty den­saýlyq pen baq-bereke tiledi. * * * AQSh Prezıdenti Barak Obama Amerıka halqynyń atynan Memleket basshysyn týǵan kúnimen  quttyqtady. «Osy aıryqsha oqıǵany otbasyńyz ben dostaryńyzdyń ortasynda atap ótip jatqan kúni Sizdi mynaǵan sendirgim keledi: men eki eldiń mańyzdy qarym-qatynastary bizdiń halyqtarymyzdyń ıgiligi úshin odan ári damı beretinine kúmán keltirmeımin», – delingen quttyqtaýda. B.Obama Nursultan Nazarbaevqa myqty densaýlyq jáne baqyt tiledi. * * * Ázerbaıjan Respýblıkasynyń Pre­zı­denti Ilham Álıev Qazaqstannyń táýel­sizdik tarıhy Nursultan Nazarbaevtyń esimimen baılanysty ekenin atap ótken. «Osy jyldary Sizdiń kemeń­ger­ligińizdiń, saıası kóregendigińiz ben bas­shy­lyǵyńyzdyń arqasynda halyqaralyq arenada bıik bedelge, Qazaqstannyń mem­­lekettigin nyǵaıtý salasynda úlken nátı­­jelerge, áleýmettik progress salasynda jan-jaqty damýǵa qol jetkizildi», – delingen quttyqtaýda. I.Álıev eki halyqtyń dostyq qarym-qatynastarynyń tarıhı tamyry tereńde jatqanyn da aıtty. «Bizdiń ıgi dástúr men seriktestik negi­zinde qurylǵan memleketaralyq qarym-qaty­nastarymyz búginde tabysty damyp keledi. Ázerbaıjan men Qazaqstannyń arasyndaǵy dostyqty nyǵaıtyp, ekijaqty qa­rym-qatynastardy damytýdaǵy Sizdiń eńbe­gińizge baǵa jetpeıdi», – delingen hatta. Ázerbaıjan Prezıdenti de Nursultan Nazarbaevqa myqty densaýlyq, baqyt jáne Qazaqstan halqynyń baqýattylyǵyn qam­tamasyz etý jolyndaǵy qyzmetine tabys tiledi. Aleksandr Lýkashenko Belarýs Respýblıkasynda Nursultan Nazarbaevty daryndy basshy jáne álemdik aýqymdaǵy saıasatker retinde biletinin aıtqan. «Siz ózińizge tán qýatty ómirlik energııa men jumyldyrýshy qasıet arqyly elińizdiń tarıhyndaǵy jarqyn betterdi jazyp jatyrsyz. Qazaqstan halqy Sizdiń bastamalaryńyzdy, memlekettik saıasat strategııańyzdy, kásibı deńgeıińiz ben kemeńgerligińizdi joǵary baǵalaıdy. Eýrazııalyq yqpaldastyqty odan ári nyǵaıtý, eki eldiń yntymaqtastyǵyn tereń­detý jáne birlesken jobalardy júzege asyrý elderimizdiń tabysty damýy men órkendeýin qamtamasyz etý úshin jańa múmkindikterge jol  ashatynyna senimdimin», – delingen quttyqtaýda. Belarýs Prezıdenti de Nur­sultan Nazarbaevqa myqty den­saýlyq, baqyt jáne bereke, jaýapty qyzmetine jańa tabystar tiledi.   * * * О́z quttyqtaýynda Qyrǵyz Res­pýb­lıkasynyń Prezıdenti Almaz­bek Atambaev  Nursultan Nazar­baevtyń baı ómirlik jáne kásibı tájirıbesi, adamı jeke qasıetteri men halyqaralyq bedeli tabysty memlekettik qyzmettiń kepili, sondaı-aq, baýyrlas Qazaqstan halqynyń ósip-órkendeýi jolyndaǵy qaltqysyz qyzmet etýdiń úlgisi ekenin aıtady. «Sizdi qaıratkerligi búkil jer sharyndaǵy beıbitshiliktiń nyǵaıýyna baǵyttalǵan óńirdiń daýsyz kóshbasshysy, tipti álemdik aýqymdaǵy kóshbasshylardyń biri dep sanaımyn. Sizdiń sara saıasatyńyzdyń, uıymdastyrýshy jáne saıası basshy retindegi dary­nyńyzdyń arqasynda  Qazaqstan búginde álemdik arenada laıyqty oryn alyp otyr. Búgingi tańda naqty mán-mańyzǵa toly qyr­ǵyz-qazaq odaqtastyq qarym-qatynasynyń jáne strategııalyq seriktestiginiń nyǵaıýyna qosqan Sizdiń baǵa jetpes úlesińizdi qana­ǵattanýshylyqpen atap aıtqym keledi», – delingen hatta. A.Atambaev eki el arasynda qalyptasqan senim men dostyqtyń bıik deńgeıin joǵary baǵalap, baýyrlas halyqtarymyzdyń ıgiligi úshin ózara yqpaldastyqtyń je­misti jalǵasatynyna senim bil­dirgen. Sońynda Qyrǵyzstan Prezıdenti Memleket basshysyna myqty densaýlyq, sarqylmas qýat jáne  memlekettik qyzmetine alda da tabys tiledi. * * * Qazaqstan Prezıdentiniń atyna Tájikstan Respýblıkasynyń Prezıdenti Emomalı Rahmonnan da quttyqtaý kelip tústi, ol Qazaqstannyń kórnekti memleket qaıratkeri retindegi Nursultan Nazarbaevtyń kópqyrly jasampaz qyzmeti ony  búkil álemdik qurmetke bólegenin atap ótken. «Qazaqstannyń táýelsizdik jyldaryndaǵy, demokratııa jáne progress jolyndaǵy barlyq basty jetistikteri men tabystary Sizdiń atyńyzben  baılanysty. Tájikstanda Sizdi jańa tarıhı kezeńdegi bizdiń eki eldiń dástúrli dostyq qarym-qatynasy men ózara tıimdi yntymaqtastyǵyn or­nyq­tyrý men údemeli damy­týdyń batyl jaqtaýshysy retinde biledi,  Tájikstan men Qazaqstannyń kóp­qyrly seriktestigin nyǵaıtýǵa Sizdiń qosqan úlesińiz orasan. El­derimiz ben halyqtarymyz ara­syndaǵy ózara yqpaldastyqty art­tyrýǵa jáne onyń aıasyn keńeıtýge Siz alda da septigińizdi tıgize bere­siz dep senemin. Biz de óz tarapy­myzdan osynaý ıgi maqsatqa qol jetkizý úshin qajettiniń bárin jasaıtyn bolamyz», – delingen jedelhatta. Sondaı-aq, E.Rahmon Memleket basshysyna myqty densaýlyq, adamı baqyt, memlekettik qyzmetine jańa jetistikter, al baýyrlas Qa­zaqstan halqyna baq-bereke tiledi. * * * О́zbekstan Respýblıkasynyń Prezıdenti Islam Kárimovtiń quttyqtaýynda Qazaqstannyń qo­­ǵamdyq-saıası ómirdi refor­malaýdaǵy eleýli tabystaryn, eldiń ekonomıkalyq, ǵylymı-teh­nıkalyq jáne ıntellektýaldyq zor áleýetin belsene júzege asyrýyn, sondaı-aq halyqaralyq arenadaǵy bedeliniń nyǵaıýyn О́zbekstan halqynyń asqan qanaǵattanýshylyqpen baǵalap otyrǵany aıtylǵan. «Bul jetistikterdiń bári Qa­zaq­stannyń memlekettiliginiń negiz­derin nyǵaıtý baǵytyndaǵy Sizdiń orasan kúsh-jigerińizben ajyra­ǵysyz baılanysty ekenine nyq senimdimin. Jaqynda ótken, Sizdiń ishki jáne syrtqy saıasatyńyzdy Qazaqstan halqynyń qoldaıtynyn, joǵary senimin taǵy da kórsetken saılaý nátıjeleri muny aıqyn aıǵaqtaıdy», – delingen hatta. I.Kárimov dástúrli jáne ýa­qyt synynan ótken dostyq, tatý kórshilestik, ózara qurmet alda­ǵy ýaqytta da kópqyrly Qazaq­stan-О́zbekstan qarym-qatyna­synyń qaryshty damýy men nyǵaıýyna, óńirdegi turaqtylyq pen qaýipsizdiktiń qamtamasyz etilýine berik negiz bolyp qala beretinine senim  bildirgen. «Osy múmkindikti paıdalana otyryp, Sizge myqty densaýlyq, baqyt, memlekettik qyzmetińizge tabys, al baýyrlas Qazaqstan halqyna ıgilik pen baq-bereke tilegim keledi», – delingen jedelhatta. * * * Reseı Federasııasy Úkimetiniń Tóraǵasy Dmıtrıı Medvedevtiń qut­tyqtaýynda Nursultan Nazar­baev­tyń esimi Qazaqstan Respýb­lıkasynyń tarıhymen tikeleı baılanysty ekeni atap ótilgen. «Siz naǵyz patrıot jáne kór­nekti memleket qaıratkeri retin­de bar kúshińizdi Otanyńyzǵa qyzmet etýge jumsap kelesiz. Qa­zaq­stannyń áleýmettik-ekono­mıkalyq damýynyń Sizdiń basshylyǵyńyzben ázirlengen jańa aýqymdy jospary tabysty júzege asatynyna senimdimin. Reseı-Qazaqstan odaqtastyǵy men strategııalyq seriktestigin qalyptastyrý men nyǵaıtýdaǵy Sizdiń jeke úlesińizdi baǵa­lamaý qıyn. Eýrazııalyq ekonomıkalyq odaqty qurýdaǵy Sizdiń rólińizdi aıryqsha atap ótkim keledi. «Bestik» elderi úkimet basshylarynyń taıaýda Qazaqstanda ótken kezdesýi, Vetnammen erkin saýda aımaǵyn qurý týraly kelisimge qol qoıylýy yqpaldastyq is-qımyldardy jańa deńgeıge kóterdi», – delingen hatta. D.Medvedev Qazaqstan Prezıdentimen ashyq ári syndarly sıpatta ótetin kezdesýlerdi jyly lebizben eske alatynyn aıtty. «Sizdiń saıası kemeldigińiz ben kóregendigińiz eń kúrdeli má­se­lelerdiń ońtaıly sheshimin tabýǵa múmkindik beredi. Sizben aradaǵy jemisti qarym-qatynasty shyn nıetimmen qýana jalǵastyramyn», – dep jazady avtor. Sońynda Nursultan Nazar­baevqa Reseı Federasııasy Úkime­tiniń Tóraǵasy myqty densaýlyq, baqyt jáne jaýapty memlekettik qyzmetine ári qaraı da tabys tiledi.