Petropavl múgedekterine 23 mln. teńgeniń medısına quraldary berildi

PETROPAVL. 22 mamyr.  Oblys ortalyǵynda turatyn 10 myńǵa jýyq múmkindigi shekteýli jandarǵa memleket tarapynan járdem júıeli túrde kórsetilip keledi. Bıyl olardyń bir tobyna 23 mıllıon teńgeniń medısınalyq qural-jabdyqtary tapsyryldy. Bul týraly oblystyq eńbekpen qamtý jáne áleýmettik baǵdarlamalar basqarmasynyń mamandary habarlady. Atap aıtqanda, 82 adam qolarbaǵa, qulaǵy kemis 47 adam 165 sýrdoquralǵa, kózi nashar kóretin 26 adam 159 tıfloquralǵa ıe boldy, 211 adamǵa gıgıenalyq jabdyqtar satyp alýǵa 23,6 mıllıon teńge bólindi.  344 qarip jan shıpajaılar men emdeý-saýyqtyrý oryndarynda bolyp, densaýlyqtaryn jaqsartyp qaıtty.  Bul maqsat úshin 75 adamǵa jergilikti qazynadan 8 mıllıon teńge bólindi. 167 adamǵa turaqty múgedektik kómek kórsetiledi. «28 jasymda eki aıaǵymnan aırylyp, birinshi toptaǵy múgedek bolyp qaldym. Buǵan deıin eski úlgidegi múgedekter arbasyn paıdalanyp kelsem, endi jańasyn berdi. Kóshede qydyrýǵa óte qolaıly», deıdi qýanyshyn jasyra almaǵan Sergeı Sapko. 10 jastaǵy múgedek qyzdyń anasy Aınash Toǵaeva 2006 jyldan beri tegin medısınalyq gıgıenalyq qural-jabdyqtar alyp keledi. О́mir Esqalı. Derek: Soltústik Qazaqstan oblystyq eńbekpen qamtý jáne áleýmettik baǵdarlamalar basqarmasy. Sýret: egemen.kz