Keshe Aqordada Elbasy Nursultan Nazarbaev Qazaqstanǵa resmı saparmen kelgen Serbııa Respýblıkasynyń Prezıdenti Tomıslav Nıkolıchpen kezdesti. Resmı qarsy alý rásimderi aıaqtalǵan soń, eki memlekettiń basshylary aldymen shaǵyn, odan ári keńeıtilgen quramda kelissózder júrgizdi.
Qazaqstan men Iýgoslavııa odaqtas respýblıkasy (Serbııa onyń quqylyq murageri) arasyndaǵy dıplomatııalyq qatynas 1996 jyldyń 10 jeltoqsanynda bastalǵan. 2011 jyldyń 23 maýsymynda Astanada Serbııanyń elshiligi ashyldy. Al 2014 jyldyń 4 aqpanynda Serbııada Qazaqstan elshisi qyzmet ete bastady.
Eki el arasyndaǵy joǵary deńgeıdegi saparlar 2010 jyly bastalyp, qazan aıynda Serbııanyń sol kezdegi Prezıdenti B.Tadıch Astanaǵa resmı saparmen kelip, Elbasy N.Nazarbaevpen kezdesý ótkizgen bolatyn. Odan basqa kezdesýler Syrtqy ister mınıstrligi basshy qyzmetkerleriniń deńgeıinde boldy.
Eki eldiń arasyndaǵy saýda-ekonomıkalyq baılanystarda Qazaqstannan Serbııaǵa mashınalar, jabdyqtar, mıneraldy jáne azyq-túlik ónimderi shyǵarylsa, ımporttyń úlesinde aǵash ónimderi, hımııa ónerkásibiniń taýarlary, toqyma jáne toqyma ónimderi basym ekendigi baıqalady. Búgingi kúni Qazaqstanda serb kapıtalynyń qatysýymen 20 BK tirkelgen. Olar negizinen qurylys pen saýda salasynda jumys isteıdi.
2010 jylǵy Serbııa Prezıdentiniń Qazaqstanǵa sapary barysynda saýda-ekonomıkalyq yntymaqtastyq boıynsha úkimetaralyq komıssııa qurylǵan. Aldyn ala aıta ketetin bolsaq, keshegi kezdesýde aldymyzdaǵy jyly osy komıssııanyń alǵashqy otyrysyn ótkizý týraly kelisimge qol jetkizildi.
Al ótken jyldyń mamyr aıynda Serbııada bolǵan sý tasqynynyń saldaryn joıýǵa Qazaqstan Úkimeti gýmanıtarlyq kómek jiberý týraly sheshim qabyldap, 10 vagon júk attandyrǵan.
Memleket basshylarynyń kezdesýiniń barysynda saýda-ekonomıkalyq, ınvestısııalyq jáne mádenı-gýmanıtarlyq salalardaǵy ekijaqty qarym-qatynas máseleleri talqylandy. Eki el basshylary halyqaralyq máselelerge qatysty da pikir almasty. Elbasymyz Qazaqstannyń Serbııa Respýblıkasymen syndarly qarym-qatynasty damytýǵa múddeli ekenin atap ótti. Biz qarym-qatynastarymyzǵa tyń serpin bere alamyz dep sanaımyn. Búgin bıznes-forým da ótedi, onda elderimizdiń isker toptary ózara tyǵyz baılanystardy jolǵa qoıa alady, dedi Nursultan Nazarbaev.
T.Nıkolıch Qazaqstanǵa shaqyrǵany úshin Nursultan Nazarbaevqa alǵys bildirdi jáne Astananyń aýqymdy damý qarqyny ózin tánti etkenin aıtty. Sondaı-aq, ol Qazaqstan halqyn «Astana» fýtbol klýbynyń ÝEFA chempıondar lıgasynyń toptyq kezeńine ótýine baılanysty quttyqtady.
Kezdesý sońynda T.Nıkolıch Nursultan Nazarbaevqa Serbııa Respýblıkasynyń ordenin tapsyrdy. Men bul ordenmen Sizdi elderimizdiń arasyndaǵy qarym-qatynasty nyǵaıtýǵa qosqan úlesińiz úshin ǵana emes, óz halqyńyzǵa jasap jatqan ıgilikterińiz úshin jáne Qazaqstannyń halyqaralyq quqyq qaǵıdattaryn saqtaýdaǵy tabandylyǵyńyz úshin marapattap otyrmyn. Siz – álemdik aýqymdaǵy, sırek sanattaǵy kóshbasshysyz, dedi Serbııa Prezıdenti.
Kelissózder aıaqtalǵan soń, Qazaqstan men Serbııa arasyndaǵy yntymaqtastyqty odan ári tereńdetýge baǵyttalǵan ekijaqty qujattarǵa qol qoıyldy. Onyń birinshisi – eki eldiń Úkimetteri arasyndaǵy halyqaralyq avtomobıl qatynasy týraly kelisim. Ekinshisi – eki eldiń Úkimetteri arasyndaǵy tabys pen kapıtalǵa salynatyn salyqtarǵa qatysty qosarlanǵan salyq salýdy boldyrmaý jáne salyq salýdan jaltarýǵa jol bermeý týraly konvensııa boldy.
Osydan keıin memleketter basshylary jýrnalısterge arnap málimdeme jasady. Onda Qazaqstan Prezıdenti N.Nazarbaev joǵary deńgeıdegi ekijaqty kezdesý eki memleket arasyndaǵy saıası, ekonomıkalyq jáne rýhanı baılanystardyń odan ári damýyna tyń serpin beredi dep sanaıtynyn jetkizdi. Sonymen qatar, Elbasy Serbııanyń Qazaqstan úshin Eýropadaǵy mańyzdy elderdiń biri bolyp tabylatynyn aıtty. Kelissózder barysynda biz eki eldiń yntymaqtastyǵyn jandandyra túsý barysynda qandaı áleýetterdi iske qosýǵa bolatynyn anyqtadyq. Bizdiń elderimizdiń arasynda ózara senimdi qatynas ornaǵan. Sondyqtan biz ózara qatynasymyzdy arttyra túsý kerektigi týraly kelistik, dedi N.Nazarbaev.
Sonymen qatar, Shyǵys Qazaqstan oblysy men Serbııanyń Zlatogorskıı ólkesi arasynda ekonomıkalyq yntymaqtastyq ornatý týraly memorandýmǵa qol qoıý kelisildi. Bizdiń elderimiz aımaqtyq jáne halyqaralyq saıasattyń kóptegen ózekti máseleleri boıynsha birtekti ustanymdamyz, deı kelip, 2017-2018 jylǵa BUU Qaýipsizdik Keńesiniń turaqty emes múshesi bolýǵa jáne DSU-ǵa múshe bolýda Serbııanyń Qazaqstan kandıdatýrasyn qoldaǵany úshin alǵysyn bildirdi. Sonymen qatar, Qazaqstannyń 2015 jylǵa Serbııanyń EQYU-ǵa tóraǵa bolýyn qoldaǵanyn jetkizdi.
О́z kezeginde T.Nıkolıch Serbııanyń Qazaqstanmen yntymaqtastyqty damytýǵa múddeli ekendigin jetkizdi. Ol Qazaqstanǵa birjaqty táýelsizdik jarııalaǵan Kosovo sheshimin moıyndamaǵany úshin alǵys bildiretinin atap ótti. Sonymen qatar, Qazaqstannyń halyqaralyq deńgeıdegi saıası máselelerde Serbııanyń ustanymyn qoldaıtyndyǵy úshin de rıza ekenin aıtty. Al ekonomıkalyq yntymaqtastyqtardy odan ári damytýda eki eldiń arasynda ashylmaǵan áleýetter kóp ekeni ataldy.
Sonymen, kelissózder ekijaqty yntymaqtastyqqa tyń serpin beretin kelisimdermen tabysty aıaqtaldy.
Jaqsybaı SAMRAT,
«Egemen Qazaqstan».
Sýretterdi túsirgender
S.BONDARENKO, B.OTARBAEV.
