Parlament Senatynyń Tóraǵasy Qasym-Jomart Toqaevtyń tóraǵalyǵymen ótken palatanyń kezekti plenarlyq otyrysynda depýtat Serik Aqylbaı Premer-Mınıstr Kárim Másimovtiń atyna saýal joldady. Onda asa kókeıkesti másele kóterilip, bylaı delinedi:
«Qurmetti Kárim Qajymqanuly! Depýtattyq saýalymnyń sebebi, jol qozǵalysy qaýipsizdigi salasyndaǵy zańnamany odan ári jetildirý máselesi bolyp tabylady. «Jol júrisi týraly» Zańnyń 54-babyna sáıkes, jol-kólik oqıǵasy kezinde oǵan qatysy bar júrgizýshi bolǵan oqıǵa týraly jaqyn jerdegi ishki ister organyna dereý habarlaýǵa, ony kórgenderdiń tekteri men mekenjaılaryn jazyp alýǵa jáne ishki ister organdary qyzmetkerleriniń kelýin kútýge mindetti. Alaıda, keı kezde avtokólik kýzovynyń usaq zaqymdanýyna baılanysty IIO qyzmetkerlerin uzaq ýaqyt kútip, joldaǵy kólik quraldarynyń qozǵalysyna bóget bolyp birneshe saǵat boıy tosyp otyrý kerek. О́kinishke qaraı, jeńildetilgen ádis boıynsha usaq jol-kólik oqıǵasyn retteýdiń naqty tetigi joq. Statıstıkaǵa júginsek, 2014 jyly ótken jyldyń uqsas kezeńimen salystyrmaly túrde jol qozǵalysy salasynda tirkelgen quqyq buzýshylyqtardyń deńgeıi 24%-ǵa artypty (2013 – 1 mln. 868 myń, 2014 – 2 mln. 321 myń). Degenmen de, atalǵan statıstıkaǵa oqıǵa qatysýshylarymen sheshilýi múmkin usaq jol-kólik oqıǵalary qosylǵan. Osy oraıda, zalaldy tikeleı óteý jáne jol-kólik oqıǵasyn rásimdeýdiń jeńildetilgen tártibi júıesiniń áreket etý tetigin engizý máselesin qarastyrý qajettigi týyndap otyr. Bul «jol-kólik oqıǵasyn rásimdeýdiń jeńildetilgen rásimi» nemese «Eýropalyq hattama» dep atalady. Onyń mindeti barlyq jol qozǵalysyna qatysýshylardyń ýaqytyn únemdeý, IIO qyzmetkerlerin shaqyrmaı-aq usaq jol apatyn dereý rásimdep, osylaısha, joldaǵy keptelisti tómendetý bolyp tabylady. Bul rette, atalǵan tetik eger: kólik quraldary ıeleriniń azamattyq-quqyqtyq jaýapkershilikterin mindetti saqtandyrýdyń qoldanystaǵy sharttary bolǵan jaǵdaıda, jol-kólik oqıǵasy nátıjesinde adamdardyń ómiri men densaýlyqtaryna zardap keltirilmegen jaǵdaıda, jol-kólik oqıǵasy eki kólik quralynyń qatysýymen (odan az da emes, kóp te emes) jáne jol-kólik oqıǵasyna qatysýshylardyń jol-kólik oqıǵasyna qatysty pikir talastary bolmaǵan jaǵdaıda qoldanylatynyn kózdeý kerek. Osy aıtylǵan tetik «Jol júrisi týraly», «Kólik quraldary ıeleriniń azamattyq-quqyqtyq jaýapkershiligin mindetti saqtandyrý týraly» zańdarǵa jáne basqa da zańnamalyq aktilerge tolyqtyrýlar engizýdi qajet etedi. Eger Birtutas ekonomıkalyq keńistiktegi elderdiń halyqaralyq tájirıbelerin qarastyratyn bolsaq, mundaı tetik Reseı Federasııasynda 2009 jyldan bastap, Belarýs Respýblıkasynda 2010 jyldan beri qoldanysta, al Fransııada (bul elde eýrohattama alǵash engizilgen) polısııa adamdar jaraqattanǵan jáne qaza bolǵan jol apattaryna ǵana barady. Mundaı shara jol-kólik oqıǵasyna qatysýshylardyń quqyqtaryn derbes bekitýge, atalmysh máseleni memlekettik organdardyń qatysýynsyz retteýge, zalaldy óteý tártibin jeńildetýge múmkindik jasap qana qoımaı, qoǵamdyq quqyqtyq sanany bekitedi. Joǵaryda baıandalǵandy eskere kele, kóterilgen máseleniń mańyzdylyǵyn nazarǵa ala otyryp, sizden atalmysh bastamany iske asyrý máselesin aǵymdaǵy zańnamalyq qyzmet aıasynda qarystyrýyńyzdy suraımyn».
Sýret: kazinform.kz
