Tasbaqalar meıramhanaǵa jete almady

Saryaǵash shekara otrıadyna qa­rasty «Qaplanbek» baqylaý-ótkizý beketinde О́z­bekstan azamaty mingen «Daewoo Matiz» kóli­giniń júk salǵyshynan 1955 dana tasbaqa tabylǵan. Úsh qapshyq pen bir qorapqa salynǵan tasba­qalar tyrbańdamas úshin skotchpen jelimdep tastalypty. Shekara qyzmeti «Ońtústik» óńirlik bóliminiń aǵa ofıseri Syrym Ormanov: «Qazaqstan Respýblıkasy Qylmystyq ko­deksiniń 234-baby 1- bóligi, ıaǵnı ekonomıkalyq kontrabanda de­regimen qylmystyq is qozǵaldy» – deıdi. Tasbaqa – keıbir memleketterde ulttyq asqa balanady, bireýler úshin jeńsik as. Ásirese, kúnine san myńdaǵan sheteldik qonaqtar sapyrylysyp kelip jatatyn Más­keý meıramhanalary dastarqan mázirindegi qymbat taǵam bolyp sanalady. Kúdikti qytaı meıramhanalaryna da ótkizbek bolǵan. Qaskúnemnen qashyp ta qu­tyla almaıtyn tas­baqalar birinshi ret shekara buzyp jatqan joq. Osydan eki-úsh jyl buryn olardy Máskeý baǵytyna qaty­naıtyn poıyzdyń júk salǵyshynda býylyp-qat­talyp ketip bara jatqan jerinen Qa­zaqstan shekarashylary men kedenshileri ózbek azamatynan tárkilegen edi. Sóıtip, Arys qala­syndaǵy ań-qusty qorǵaý aı­maǵyna jiberilgen. Qumshaýyt dalanyń sánine aınalyp, kózge jıi shalynar edi. Tegin olja kórgen bireýler terip alyp ketti me, qazir kózge túse qoımaıdy. Baqtııar TAIJAN, «Egemen Qazaqstan». Ońtústik Qazaqstan oblysy.