Jaqynda Ońtústik Qazaqstan oblystyq sotynyń tóraǵasy Nurserik Sháripovtiń bastamasymen Konstıtýsııanyń 20 jyldyǵy merekesine oraı «Bılerge taǵzym» atty velosherý ótti.
Qyryq sýdıa qatysqan velosıpedshiler sapary oblystyq sottyń ǵımaraty aldyndaǵy «Úsh bıdiń» eskertkishi janynan bastaý alyp, 40 shaqyrym joldy artqa tastaǵannan keıin Ordabasy taýynda ornalasqan «Birlik» monýmentine taban tiredi.
Sapar aldyndaǵy jıynǵa qatysýshylardyń atynan sóz sóılegen oblystyq sottyń tóraǵasy N.Sháripov: «2015 jyl elimiz úshin mereıli de merekeli jyl bolyp bastaldy. Bıyl elimizde Qazaq handyǵynyń 550 jyldyǵy men Uly Jeńistiń 70 jyldyǵy jáne Qazaqstan halqy Assambleıasy men Konstıtýsııanyń 20 jyldyqtaryna oraı túrli is-sharalar uıymdastyrylýda. Eń aldymen, búgingi táýelsiz memleketimizge tuǵyr bolǵan Qazaq handyǵynyń 550 jyldyǵyn atap ótýge barynsha kóńil bólinýde. Soǵys ardageri, «Úsh bı» tósbelgisiniń ıegeri, Qazaqstannyń «Qurmetti sýdıasy», Maqtaaral aýdanynyń «Qurmetti azamaty» Aıtjan Beknazarovpen, soǵys jyldary Ordabasy aýdanynda sýdıalyq qyzmet atqarǵan, tyl ardageri Jamal Shoıbekovamen aýdandyq, oblystyq sottarda kezdesýler ótkizildi. Oblystaǵy ekinshi dúnıejúzilik soǵysqa qatysýshy 24 sýdıaǵa «Dańq taqtasy» ornatyldy. Sonymen qatar, Qazaq handyǵynyń 550 jyldyǵyna oraı Túrkistan qalasyndaǵy Qoja Ahmet Iаsaýı atyndaǵy Halyqaralyq qazaq-túrik ýnıversıtetinde «Esim hannyń eski joly – aýyzsha qaǵıdalar jıyntyǵynyń ozyq úlgileri» atty aımaqtyq ǵylymı konferensııa ótse, onyń aıasynda «Qazaq handyǵynyń tarıhyndaǵy Túrkistannyń orny» taqyrybynda jáne oǵan qosa sýret, kitap kórmeleri uıymdastyryldy. Konferensııada Qazaq handyǵy tusyndaǵy memlekettik bılik, bıler soty men qazaqtardyń dástúrli quqyǵy taqyrybynda belgili tarıhshy, zańger, tilshi ǵalymdar men zertteýshilerdiń baıandamalary tyńdalyp, onyń qorytyndysy retinde konferensııa materıaldary óz aldyna kitap bolyp basylyp shyqty. Endi, mine, Konstıtýsııanyń 20 jyldyǵyna arnalǵan myna shara sol jobalardyń jalǵasy ispetti. Muny ótkizýdegi maqsat bıylǵy mereıli merekelerdi salamatty ómir saltymen ushtastyra otyryp, birliktiń bastaýy bolǵan Ordabasy taýynyń mártebesin Qazaq handyǵynyń 550 jyldyǵynda taǵy bir márte jańǵyrtý bolyp tabylady», dedi tóraǵa óz sózinde.
Osydan keıin Ońtústik Qazaqstan oblysy ákiminiń orynbasary E.Aıtahanov pen oblystyq sport salasy ardagerleri keńesiniń tóraǵasy A.Asqar quttyqtaý sóz sóılep, sýdıalarǵa sátti sapar tiledi.
Túske taıaý velosıpedshiler 40 shaqyrym joldy basyp ótip, respýblıkalyq «Ordabasy» Ulttyq tarıhı-mádenı qoryǵyndaǵy» márege jetti. Olardy Ordabasy aýdanynyń basshylary men sport qaıratkerleri jáne aýyl turǵyndary saltanatty jaǵdaıda qarsy alyp, «Nur Otan» partııasynyń aýdandyq fılıalynyń tóraǵasy J.Bostandyq velosherýge qatysýshylardy quttyqtap, sóz sóıledi. Ordabasy taýynda ornatylǵan «Birlik» monýmentine gúl shoqtary qoıylyp, Tóle, Qazybek jáne Áıteke bılerge taǵzym etilgennen keıin, Ordabasy aýdanynyń ákimi S.Saparbaev, oblystyq sottyń sýdıasy A.Elshibaev jáne aýdannyń «Qurmetti azamaty», eńbek ardageri R.Bıtýǵanov velosherýge qatysýshylarǵa alǵystaryn jetkizdi. Joba sońynda oblystyq sottyń tóraǵasy N.Sháripov mundaı is-sharalardyń, ásirese, keıingi jastar úshin tárbıelik máni óte zor ekendigin atap ótti.
Qabyl DÚISENBI,
OQO sotynyń Aqparattyq qamtamasyz etý bóliminiń
basshysy.
