Bul toı burynǵylardan ózgerek

О́ńir kóreremenderine tanymal telejúrgizýshi Qonysbek Terekuly shańyraq kóterdi. Onyń tańdap alǵan súıgen jary  Áıken de osy salada jumys isteıdi. Tilshiniń toıy burynǵylarǵa qaraǵanda ózgeshe ótti degendi estip, áriptes inimizben telefon arqyly habarlasqan edik. Shalqar qalasynda ótken  toıǵa 300-den astam qonaq shaqyrylǵan kó­rinedi. Biraq, olardyń birde-bireýi jınalǵan jurttyń aldyna shyǵyp, jas jubaılarǵa tost kóterip, tilek aıtpapty. Toıda tek jańa qudalardy bastap kelgen azamat qana sóz alǵan. Onyń ózi de sal­ta­nat­qa jınalǵandarǵa  serik­terin tanystyrýmen ǵana shektelgen. Ortaǵa shyǵyp tilek aıtylmady deme­seń, onyń basqasha joly da tabylypty. – Bizdegi toılardyń talaıyn kórip júrmiz. Qonaqtar biriniń aıtqan sózin ekinshisi qaıtalap turyp alady. Jurt ta jalyǵady. Men óz toıymnyń ózgeshe ótkenin qaladym, uzaq-sonar sóz sóıleý dástúrinen bas tartýdy jón dep taptym. Aq tilegin aıtqysy kelgender «Tilek buryshyndaǵy» mıkrofondy alyp, arnaıy kameraǵa júrekjardy lebizderin  bildirip  jatty. Biz ony mindetti túrde kóretin bolamyz. Bir baıqaǵanym, toı­da sóz berilmegenine eshkim ren­ji­gen de jáne dastarqannan attap ketken de joq, – deıdi qýanysh ıesi. Aıtsa aıtqandaı, ortaǵa shy­ǵyp alyp, biriniń aıtqanyn ekinshisi qaıtalap, sóz jarysyna túsip ketetin aǵaıyndardyń jurttyń altyn ýaqytyn alyp, mezi etip jiberetinin kórip júrmiz. Bul toı­dyń ózgelerge qaraǵanda taǵy bir ózgesheligi bar. Qonysbek Terekulynyń toıy kópirme sózsiz (tostsyz) ǵana emes, ishimdiksiz de ótken. Osydan 5 jyl buryn jaqsy yrymǵa balap,  jer astyna kıikotymen ystalǵan 150 lıtr qymyz kómgen eken. Ishine shıki qazy salynǵan qymyzdy toıdan bir kún buryn qazyp alǵan. Babymen saqtalǵan qymyzdyń dámi til úıiredi, eshqandaı buzylmapty. Toıdyń (tostsyz) sóz sóılenbeı ótýi Aqtóbe óńiri úshin tosyndaý jaıt. О́ıtkeni, Aqtóbede toıǵa shaqyrylǵan qonaqtardyń barlyǵy da shama kelse óz tilekterin bil­dirýge qushtar. Tipti, kópirme sóz­diń shylaýynda ketip,  merekeniń bereketin alatyndary da kezdesedi. Sóz berilmegenine renjip, minez kórsetip qalatyndar da bolyp jatady. Alaıda, derek kózderinen málim bolǵanyndaı, Qonysbektiń  toıyna shaqyrylǵan 300-den astam qonaq tún aýǵansha bolǵan saltanattyń aıaǵyna deıin sabyr saqtap, toıdyń ajaryn keltiripti. Muny kúıeý jigittiń ózi de rastady. Ol toıdyń baǵdarlamasyna deıin ózi jasaǵanyn jasyrmady.   Qonysbektiń  ákesi Terek te, ana­sy Sara da ulaǵatty ustazdar, qazir eńbeginiń jemisin kórip otyrǵan zeınetkerler. Qonysbek toı ústinde súıiktisine óz ájesi, keıin anasy taqqan altyn júzikti syılapty. Munyń ózi otbasylyq qundylyqtardy saqtaýdyń, urpaq­tar sabaqtastyǵynyń kórinisi deý oryndy. Bul da aıta júrerlik ónege. Qazaqtyń toıynyń mádenıeti men qyzyqty ótýi haqynda kóptegen oılar aıtylyp júr. Bul toıdan da úırenerlik úlgiler bar ekeni sózsiz. Satybaldy SÁÝIRBAI, «Egemen Qazaqstan».  Aqtóbe oblysy.