ASTANA. 18 qazan. Búgin kásipqoı boksta el namysyn abyroımen qorǵap júrgen otandasymyz Gennadıı Golovkın AQSh-tyń Nıý-Iork qalasynda kanadalyq Davıd Lememen kezdesti. Tartysty jekpe-jek nátıjesinde otandasymyz 8-raýndta tehnıkalyq nokaýtpen jeńiske jetti. Bul týraly egemen.kz habarlady.
Jekpe-jek ataqty Madisson Square Garden arenasynda ótti. Golovkın alǵashqy mınýttardan bastap shabýylǵa shyǵyp, Lemeniń osal tusyn izdedi. Úshinshi raýndta kanadalyq birneshe qarymta shabýyl uıymdastyrdy. Alaıda, saýatty qorǵana bilgen Golovkın qarsylasynyń joıqyn soqqylaryn ózine darytpady.
Besinshi raýndta otandasymyzdyń búıirden jasaǵan aýyr soqqysyna shydaı almaǵan Leme tizerleýge májbúr boldy. Alaıda, ol jekpe-jekti ári qaraı jalǵastyrýdyń amalyn tapty.
Degenmen, kanadalyq bul joıqyn soqqydan keıin óz-ózine kele almaı, qalǵan ýaqytta Golovkınniń kezekti nysanasy ǵana boldy. Nátıjesinde murnynan qan toqtamaı, kózi qaraýytqan Lemege jany ashyǵan tóreshi 8-raýndta kezdesýdi toqtatýǵa májbúr boldy.
Osylaısha, Gennadıı Golovkın orta salmaqta WBA (Super), IBO jáne WBC (Interim) nusqalary boıynsha chempıondyq ataǵyn qorǵap qana qoımaı, Lemege tıesili bolǵan IBF tujyrymy boıynsha da chempıondyq beldikti ıemdendi.
CompuBox usynǵan derekke súıensek, kezdesý barysynda Golovkın 549 soqqy jumsap, sonyń 280-nin dittegen jerine dóp tıgizgen. Al Leme 335 soqqynyń 89-yn ǵana dál baǵyttaǵan.
Bul qazaqstandyqtyń kásipqoı rıngtegi 34-jekpe-jegi. Sonyń bárinde jeńiske jetken Golovkın 31 márte qarsylasynan nokaýtpen basym tústi. Sondaı-aq, otandasymyz qatarynan 21 ret kezdesýin merziminen buryn aıaqtaǵanyn atap ótken jón.
Taǵy bir eskeretin jaıt, Golovkın men Lemeniń aıqasy HBO telearnasynyń aqyly translıasııa júıesi (PPV) boıynsha kórsetildi. Bul eki boksshy úshin de PPV-degi alǵashqy jekpe-jek. Búgingi keshte Genanyń syıaqysy 2 mln dollar bolsa Davıd 1,5 mln dollarǵa ıe boldy.
Endi Golovkın orta salmaq boıynsha WBC nusqasynyń chempıondyq beldiginen mindetti úmitker atandy. Qazirgi tańda bul beldik pýertorıkolyq Mıgel Kottoǵa tıesili. Ol chempıondyq ataǵyn qorǵaý úshin 21 qarashada AQSh-tyń Las-Vegas qalasynda meksıkalyq Saýl «Kanelo» Alvarespen judyryqtasady.
Elaman Qońyr.
Derek: egemen.kz.
Sýret: vk.com.
