Asylymyzdy ardaqtaıyq

Bizdiń qazirgi qoldanystaǵy Ata Zańymyzdyń 1995 jyly búkilhalyqtyq referendýmda qabyldanýy elimizdiń táýelsizdik tarıhyndaǵy jańa dáýirdiń bastalýynyń aqıqaty. «Qazaqstan Konstıtýsııasy – zań qarpinde órnektelgen jalpyulttyq ıdeıa. Ol bizdiń ata-babalarymyzdyń kóptegen urpaqtarynyń azattyq jáne óz taǵdyryn ózi sheshý múmkindigi týraly, bılik barsha halyqtyń múddesine qyzmet etetin memleket týraly, búkil álemge belgili ári qurmetteletin táýelsiz el týraly armandarynyń osy zamanǵy quqyqtyq túsinikterin beıneleıdi», dep atap ótken Elbasymyz halyq tańdaýynyń durystyǵyn búgingi kúni búkil álemge pash etip, elimizdiń ekonomıkasyn órletip, onyń halyqaralyq bedeliniń arta túsýin salıqaly saıasaty jáne qajyrly eńbegimen dáleldeýde. Ata Zań negizinde el aýmaǵynyń tutastyǵy, qaýipsizdigi qamtamasyz etilse, elimizdiń Prezıdenti – halyq pen memlekettik bılik birliginiń, Konstıtýsııanyń myzǵymastyǵynyń, adam jáne azamat quqyqtary men bos­tandyqtarynyń kepili. Respýblıkany damytý, órkendetý maqsatynda Konstıtýsııada bekitilgen normalardyń atqaratyn róli erekshe. Ol elimizdiń barlyq azamattarynyń birigip qyzmet etýleri úshin qajetti jaǵdaılardy jasap qana qoımaı, sonymen qatar, azamattarymyzdyń shynaıy erkindigin júzege asyrady. Mine, sondyqtan da adamnyń quqyqtaryn joǵary qoıý memleket qyzmetiniń negizgi baǵyty bolyp tabylady. Ata Zańnyń qabyldanǵanyna bıyl 20 jyl toldy. Osy ótken qysqa merzim ishinde elimiz óz táýelsizdigin ornyqtyryp qana qoımaı, ony odan ári nyǵaıtyp, álem tanyǵan irgeli memleketke aınala bildi. Qazaqstannyń júzege asyrǵan ekonomıkalyq, áleýmettik, saıası qaıta qurýlary men qol jetken jetistikteri túgeldeı Konstıtýsııamyzben tyǵyz baılanysty ekeni kúmánsiz. Elimizdiń Ata Zańy júzdegen jyldar boıy qalyptasqan adamzat balasynyń jalpy qundylyqtaryn óz boıyna sińire otyryp, adam­dardyń tabıǵı quqyqtary men bostandyqtaryn, bılik ınstıtýttaryn demokratııalyq jolmen qalyptastyrý jáne damytýdy júzege asyryp, Qazaqstan aýmaǵynda azamattyq qoǵam qurý týraly dúnıejúzi tanyǵan progressıvti ıdeıalardy bekitti. Ol elimizde san alýan ıdeologııalyq, ulttyq, azamattyq ujymdar men toptardyń birlesip beıbit ómir súrýin qamtamasyz etýge baǵyttalǵan. Konstıtýsııamyzda bekitilgen normalar elimizdiń barlyq azamattarynyń birlesip, bir jeńnen qol, bir jaǵadan bas shyǵaryp qyzmet etýleri úshin barlyq jaǵdaılardy jasaǵan. Adam quqyqtary men bostandyqtaryna arnalǵan normalary basqa salalyq zańnamalardyń mazmunyna óziniń oń áserin tıgizýde. Qazirgi Kons­tıtýsııamyzda azamatqa qur­metpen qaraý, onyń jeke quqyq­taryn taptamaý, zań aldyn­daǵy teńdik, jalpy teńdik qaǵıdalary naqty belgilengen. Ata Zań – Qazaqstannyń tólqujaty. Ol qazaq hal­qy­nyń taǵdyryna jaýap beretin, uly qujat ári tártiptiń, ıman­dylyqtyń, mádenıettiń bas­taý kózi. Onyń árbir taraý­yn boıǵa darytyp, júrekpen qabyldaǵan jón. Sebebi, onda ulttyq namysymyz ben azamattyq arymyzdyń ǵumyrlyq bolmysy sıpattalǵan, al árbir bap túbi tereń qundylyqtardy jańǵyrtý men saqtaýǵa negizdelgen. Árbir qazaqstandyq, óziniń qonys teýip turyp jatqan eliniń na­ǵyz patrıoty retinde Otany – Qazaq­stannyń ósip-órkendeýine jáne onyń barynsha damýyna súbeli úlesterin qosqany ári ony óziniń qasıetti boryshy dep sezinýi abzal. Konstıtýsııa bizdiń eldiń tarıhynda beıbitshiliktiń, jasam­pazdyqtyń jáne órken­deýdiń Konstıtýsııasy bolyp qala beretini haq. Sondyqtan, árqaısymyz Konstıtýsııamyzdy qurmettep, onyń joǵary quqyqtyq mártebesin syılaýymyz qajet. Seıitqul Qalıbekov, «HQKO» RMK Almaty oblysy fılıalynyń Aqsý aýdandyq bóliminiń ınspektory, zańger.