Kitaphanadaǵy kórme

El Prezıdenti Nursultan Nazarbaevtyń «Nurly Jol – bolashaqqa bastar jol» atty Joldaýynda atalyp ótken merekelerdiń biri – Qazaqstan Respýblıkasy Konstıtýsııasynyń 20 jyldyǵy. Atalmysh mereıtoıǵa oraılastyryp, S.Báıishev atyndaǵy oblystyq ámbebap-ǵylymı kitaphanasy jastardyń Ata Zańnyń qalyptasý tarıhynyń kezeńderi men Konstıtýsııanyń sıpaty, mańyzy týraly bilimderin tereńdetý, zań aldyndaǵy jaýapkershilikterin arttyrý, olardy óz quqyǵy men mindetterin bilýge, Ata Zańymyzdy, memlekettik rámizderimizdi qasterleýge úıretý maqsatynda «Ata Zańym – Aıbarym!» atty turaqty kitap kórmesin uıymdastyrdy. Táýelsizdik alǵanǵa deıingi kezeńderde qazaqtyń jazylmaǵan dala zańyna baǵynǵany belgili. Dala erejeleri qaǵazǵa túspese de bilikti, zerdeli, bedeldi adamdardyń, aqsaqaldardyń aýzynan kópke tarap, ǵasyrlar kóshine ilesip, jalǵasyp otyrǵan. Osyǵan oraı, kórmege «Mádenı mura» memlekettik baǵdarlamasymen shyǵarylǵan «Qazaqtyń ata zańdary» 10 tomdyq qujattar, derekter jáne zertteýler, S.Tabanov pen A.Orazovanyń «Kúrdeli zamannyń ótpeli kezeńderindegi qazaq qoǵamy Ata Zańdarynyń (Konstıtýsııalarynyń) tarıhı-quqyqtyq sabaqtastyǵy», О́miráli Qopabaevtyń «Ata Zań – memleket damýynyń irgetasy» atty eńbekteri, qoldanystaǵy Konstıtýsııa, Elbasynyń ár jyldardaǵy jáne hronıkalyq qyzmetteri jaıynda kitaptary, Qazaqstan halqyna arnaǵan Joldaýlary, Assambleıanyń 20 jyldyǵyna arnalǵan kitaptar qoıyldy. Oqyrmandar kórmede kitaphana qorynda bar kitaptarmen, fotoalbomdarmen, merzimdi basylymdarda jarııalanǵan tyń derektermen, túrli-tústi fotolarmen tanysa alady. Toǵyz bólim, toqsan segiz baptan turatyn Konstıtýsııa – taǵdyr talaıynda toqsan taraý­ly joldan ótken ultymyzdyń basyn bir arnaǵa toǵystyrǵan zor mán-mańyzǵa ıe qujat. Bul kúndi memlekettik mereke retinde belgileýde Elbasymyzdyń kózdegeni eldiń Ata Zańǵa degen qurmetin arttyrý bolsa kerek. Árbir adamnyń, memlekettik mekemeler men qoǵamdyq uıymdardyń el Konstıtýsııasyna degen qurmetin, izetin arttyrý bárimizge ortaq mindet. Endeshe, ortaq mindetti oryndaýda bir jeńnen qol, bir jaǵadan bas shyǵara bilý barshamyzǵa sert. Aldaǵy ýaqytta da Konstıtýsııanyń 20 jyldyǵyna oraı kitaphana qyzmetinde qazirgi Ata Zań týraly jastarǵa tolyqqandy aqparat berýde is-sharalar óz jalǵasyn taba bermek. Gúlzada BEIISOVA, S.Báıishev atyndaǵy Aqtóbe oblystyq ámbebap-ǵylymı kitaphanasynyń qyzmetkeri. Aqtóbe.