Mysyr soty eldiń burynǵy prezıdenti Muhammed Mýrsıdi ólim jazasyna kesti. Bul jer-jerde ártúrli pikir týdyryp jatyr. Bireýler, kim de bolsa, jazasyn tartýy tıis dep, ony laıyqty sanasa, bireýler tym qatań dep esepteıdi.
Qylmysqa toqtalaıyq. Ol úshin eldegi sońǵy jyldardaǵy oqıǵalarǵa júginesiń. 2011 jylǵy revolıýsııa barysynda Hosnı Múbáraktyń avtorıtarlyq bıligi qulap qana qoıǵan joq, ıslamıstik qozǵalys bıikke kóterildi. Buryn tyıym salynǵan «Musylman baýyrlar» uıymy bostandyqqa shyqty, sol ıslamısterdiń qoldaýymen Muhammed Mýrsı alǵash ret demokratııalyq jolmen, daýys berý jolymen prezıdent bolyp saılandy. О́zin qoldaýshy ıslamıster bolǵan soń, Mýrsıdiń solardyń sózin sóıleýi zańdy da. El ıslamıstik baǵytqa oıysyp bara jatty. Buryn zaıyrlylyq baǵytty ustanǵan Mysyr jurtshylyǵyna bul unaǵan joq. Halyqtyń qarsylyǵyna ushyrady. Onyń aqyry bılikke áskerılerdiń aralasýyna soqtyrdy. Eldiń qorǵanys mınıstri Abdýl Fattah as-Sısı 2013 jyldyń jazynda Mýrsıdi ornynan taıdyryp, taıdyrǵanda túrmege jaýyp, bılik áskerılerdiń qolyna kóshti. Bılikte bolǵan eki jylda Muhammed Mýrsı biraz nárseni búldirip úlgergen edi. Eń aldymen halyqaralyq aýqymda terrorlyq top sanalǵan «Musylman baýyrlar» uıymyna erkindik berip, olardyń qamaýda otyrǵan belsendilerin bosatty. Olardyń moınynda talaı adamnyń qany bar edi. Tek olardyń ǵana emes, túrmeniń qaqpasy ashylyp, talaı qylmysker bostandyqqa shyqty. Burynǵy prezıdentke qoıylyp otyrǵan basty aıyp – osy. Bostandyqqa shyqqan soń, sol ıslamısterdiń, qylmyskerlerdiń, eldiń berekesin ketirgen qylmystary óz aldyna. Basqasyn bylaı qoıǵanda, sol ıslamıster el halqynyń 10 paıyzdaıyn quraıtyn hrıstıan-kopttarǵa jasaǵan ozbyrlyqtary el sıpatyna jaǵylǵan qara kúıege aınaldy. Saıası qaqtyǵystardan kóptegen adam qaza tapty. Burynǵy prezıdentke taǵylǵan aıyp kóp. Jýrnalısterdi óltirgeni úshin de oǵan ólim jazasy kesilmek edi, sot 20 jyldyq jazamen shekteldi. Shetelge qupııa qujattar bergeni úshin de oǵan ólim jazasyn berý kerek degen másele kún tártibinde tur. Bir ólim jazasyn arqalaǵan soń, basqasyna onsha mán berilmeı jatqanǵa uqsaıdy. О́lim jazasyna kesildi-aý, biraq ony áli Múftıler keńesi bekitýge tıis. Ol aldaǵy aıdyń basynda qaralady. Egıpettiń ózinde de, syrtta da bul máseleniń qyzý talqylanýy bir jaǵy sol Múftıler keńesine yqpal etýdi kózdeıtindeı. Atap aıtatyn bir jaı: Kaır sotynyń sheshimine qarsylyq bildirýshilerdiń basynda Eýroodaq tur. EO-nyń Shetelder jáne saıası qaýipsizdik máseleleri boıynsha joǵarǵy ókili Federıka Mogerını málimdeme jasap, úkimniń «Egıpet mindetine alǵan halyqaralyq zańdylyqqa saı kelmeıtinin» atap kórsetti. Germanııanyń syrtqy ister mınıstri F.Shtaınmaıer de, AQSh prezıdentiniń ákimshiligi de qarsylyqtaryn bildirip úlgerdi. Biraq muny Egıpet syrtqy ister mınıstrligi ózderiniń ishki isterine aralasý dep sıpattap otyr. Elde Muhammed Mýrsıdiń jaqtaýshylary jeterlik, olar da qarsylyqtaryn bildirip jatyr. «Musylman baýyrlardyń» basshylary Mýrsıdi ólim jazasyna keser bolsa, ózderiniń qarýly kúreske shyǵatynyn da málimdedi. Qylmys jazalanýǵa tıis deımiz. Árıne, ustanym – ádilettilik. Mýrsı halyq saılaǵan prezıdent boldy. Onyń áreketteri qatygezdik pe, qatelik pe? Eki jaǵy da bar shyǵar. Bul jerde qazylyq halyq janynyń jaralanbaýynda jatyr-aý.
Mamadııar JAQYP, «Egemen Qazaqstan».
