Elbasy barsha qazaqstandyqty Astana kúnimen quttyqtady

ASTANA. 6 shilde. Elordada Memleket basshysynyń Astana kúnine arnalǵan saltanatty qabyldaýy ótti. Bul týraly akorda.kz habarlady. Is-sharaǵa Parlament depýtattary, Úkimet músheleri, memlekettik organdar men dıplomatııalyq korpýs, zııaly qaýym jáne iskerlik orta, mádenıet pen bilim berý salasy ókilderi qatysty. Memleket basshysy óz sózinde nebári 17 jasqa tolǵan el astanasynyń qazirdiń ózinde baı ári dańqty tarıhy bar ekenin aıtty. «Búginde eldiń bas qalasy tek biregeı ǵımarattarymen ǵana emes, qaıtalanbas ózindik ahýal-tynysymen de erekshelenedi. Astananyń óz «gravıtasııasy» bar, ol talanttardy, jańa jobalardy, qarjylyq, zııatkerlik jáne áleýmettik kapıtaldy ózine tartyp turady. Osynda ómir súrýge, óz bolashaǵyn osynda bederleýge umtylǵandar barǵan saıyn kóbeıýde. Astana halqynyń sany kútkendeginiń bárinen de asyp túsip, mıllıonǵa jýyqtap qaldy. Bul rette qalanyń elge bereri de kóbeıe túsýde. Búginde Astana – respýblıkalyq bıýdjettiń donoryna aınalǵan óńirdiń biri», – dedi Qazaqstan Prezıdenti. Nursultan Nazarbaev eldiń áleýmettik jáne ekonomıkalyq ómirine tıgizip otyrǵan elordanyń oń yqpalyn atap ótti. «Astana qazirdiń ózinde tek eldiń ǵana emes, Ortalyq Azııa óńiriniń bilim berý jáne medısına haby róline ıe bolyp otyr. «Nurly jol» baǵdarlamasyn júzege asyrý eldiń barlyq óńirin elordaǵa jaqyndata túsýde. Jańa Jibek joly jobasy Qazaqstandy Eýrazııa qurlyǵynyń ortalyq memleketine aınaldyrady. «EKSPO-2017» halyqaralyq kórmesin ótkizý elimizdiń tehnologııalyq kóshbasshylyǵyn qamtamasyz etip, álemge Qazaqstannyń balamaly energetıka salasyndaǵy jetistikterin áıgileıdi. «Astana» halyqaralyq qarjy ortalyǵyn qurý – taǵy bir órshil bastamamyz. Ol Astananyń ǵana emes, búkil respýblıkanyń kóp jyldarǵa arnalǵan damý baǵytyn aıqyndap beredi. «Lokaldy kóshbasshylyq jáne jahandyq básekege qabilettilik» – biz ustanatyn formýla osy. Kórip otyrǵanymyzdaı, Astanada qazirdiń ózinde osy jospardy júzege asyrý úshin jumys júrgizilýde», – dedi Memleket basshysy. Sonymen qatar, Qazaqstan Prezıdenti merekege óziniń jeke basynyń qatysy jónindegi oıymen bólisti. «Qala kúni de adamnyń týǵan kúni sııaqty – ol tek merekeleýge sebep qana emes, esep berip, qorytyndy jasaýdyń da bir múmkindigi. Men úshin mereıtoı jeke basymnyń merekesi bolǵan kezeń áldeqashan artta qaldy. Meniń búkil jumysym men bar ómirim elmen etene baılanysty. Men úshin Qazaqstannyń, onyń elordasynyń jáne árbir óńiriniń jańa tabysynan artyq quttyqtaý joq jáne bolmaq emes», – dedi Nursultan Nazarbaev. Sondaı-aq, Memleket basshysy Astanany odan ári damytýǵa atsalysqandary úshin qatysýshylarǵa alǵys aıtty. «Bul jerde jańa jáne biregeı Eýrazııa mádenıeti qalyptasady, jastar básekege laıyq bilim alady, bolashaqqa senimmen qadam basatyn jańa otbasylar qurylady. Birligimizdiń, eńbeksúıgishtigimizdiń, tabandylyǵymyzdyń arqasynda bizdiń alǵa qoıǵan barlyq maqsatymyzǵa jetetinimizge senimdimin», – dedi Qazaqstan Prezıdenti. Sońynda Nursultan Nazarbaev barsha qazaqstandyqtardy merekemen quttyqtap, ıgilik pen baq-bereke tiledi. Elaman Qońyr. Derek, sýret: akorda.kz.