Soltústikqazaqstandyq omartashylar eksportqa 100 tonna bal ázirledi

PETROPAVL. 24 mamyr.  Bıylǵy jyldyń sáýir aıynda Qyzyljar óńiriniń arnaıy delegasııasy Birikken Arab Ámirlikterinde bolyp, Elbasynyń qazaqstandyq ónimderdi nasıhattaý usynysyn júzege asyrý bastamasy sheńberinde birqatar ekonomıkalyq, saýda-sattyq mámilelerge kelisken edi. Oǵan soltústikqazaqstandyq bal óndirýshiler birinshi bolyp ún qatyp, 100 tonna sapaly bal ónimin Dýbaıǵa eksporttaýdy kózdep otyr. Bul týraly egemen tilshisi habarlady. Omartashylar mundaı tabysqa BAE ınvestorlarymen yntymaqtastyq ornatý arqyly qol jetkizdi.  Oblystyq bal sharýashylyǵy qaýymdastyǵy AQ-nyń tóraǵasy Oleg Gavrılov málimdegendeı   Dýbaıda uıymdastyrylǵan tamaq ónerkásibi kórmesine baldyń 7 surpyn ala baryp, arabtar úlken qyzyǵýshylyq tanytqan.  Ekijaqty shart rásimdelgennen keıin jergilikti ara ósirýshiler birden iske kirisken. «Qazaqstanda bir kılo bal 1500 teńge bolsa, ol jaqta 7-8 myń teńgege baǵalanady.  Maýsymda bizdiń oblysqa BAÁ-nen delegasııa kelip, jańa kelisimderge qol qoıatyn bolamyz», deıdi O. Gavrılov. Qazir assosıasııa quramynda 200-ge jýyq omartashy bar.  «Passık Qyzyljar» JShS-niń dırektory Oleg Gavrılovtyń ózi ǵana jyl saıyn kemi 10 tonna bal ónimin jınap, Qazaqstannan tysqary jerlerge ótkizip júr.  Bal aralaryn Shymkentten ákelip, avstrııalyq «karnık» tuqymmen shaǵylystyrǵan. Nátıjesinde ónimdilik molaıyp, sapasy da jaqsara túsken. Bal óniminiń alǵashqy partııasyn maýsym aıynda jóneltý josparlanǵan. О́mir Esqalı. Derek, sýret: egemen.kz.