Tarazda balabaqshaǵa esek eti berilý deregi tekserilip jatyr

ASTANA. 5 sáýir. Tarazda «Ánet-A» atty jeke balalar baqshasyna esektiń eti berilgeni týraly qaýeset tekserilip jatyr. Bul týraly 24KZ telearnasy habarlady. Osynyń aldynda áleýmettik jelide et jetkizýshilerdiń arbasynda belgisiz bir janýardyń basy jatqany kórsetiletin vıdeo jarııalanǵan edi. Ony qarsy turǵan úıdiń terezesinen qala turǵyndarynyń biri uıaly telefonymen túsirip alǵan eken. Beınejazba jarııalanǵan boıda Taraz qalasynyń mal dárigerlik veterınarııasynyń ınspektorlary atalmysh balalar baqshasyna kelgen. «Keshe, 2 sáýir kúni tús qaıta qalalyq prokýratýranyń talap etýi boıynsha «Ánet-A» balalar baqshasyna bardyq. Biz azyq-túlik blogyndaǵy et ónimderine tekserý júrgizdik. Ol jerde 100 kılogramm shamasynda et saqtalypty. Odan zerthana úshin kesip aldyq. Tekserý qorytyndysy 7-8 sáýirde, ıaǵnı 5 kúnnen keıin belgili bolady», - dedi Taraz qalasy bas veterınar-sanıtar ınspektory Asqar Túıtebaev. Veterınar ınspektorlary tońazytqyshtardy plombymen jaýyp, jaǵdaı anyqtalǵansha ondaǵy ónimderdi paıdalanýǵa tyıys saldy. Ázirge ettiń kelisimshart negizinde Baızaq aýdanynan jetkiziletini anyqtaldy. Endi vetınspeksııa laboratorııasynda alynǵan ettiń qandaı janýardyki ekenin jáne onda juqpaly aýrýdyń bar-joǵyn tekseredi. Jeke balalar baqshasynyń ıesi bolsa, onyń sıyr ekenin aıtady. Qurysh Nurymbet. Mánbe, sýret: 24KZ.