Keleshektiń kesheni

Qaraǵandyda salynatyn sporttyq ǵımaratqa Golovkınniń esimi berilmekshi Arqa jurty ataqty Gennadıı Golovkındi «Maıqudyqtyń muz­balaǵy» dep áspetteıdi, alaqanyna salyp, kókke kóteredi. Iá, qazaqtyń atyn aıdaı álemge jaıyp júrgen áıgili boksshy Qaraǵandynyń irgesinde jatqan osy bir eldi mekende kir jýyp, kindik kesken. Zady, Maıqudyqtyń ataǵy ór keýde, minezi kesek uldarymen shyqqan. Ras, arasynda az-maz tentektigi bolǵan shyǵar... áıtse de bóri tektes órenderiniń ómirdiń ár salasynda, ásirese, sportta boıǵa bitken bula kúsh, qaısar rýhtyń arqasynda buzyp-jaryp jol salyp, abyroı-bedelge bólenip júrgeni ras. Maıqudyqtyń sondaı sańlaq uldarynyń biri, sóz joq búgingi kúnde álemdik bokstyń «GGG» tanymal tańbaly trendi bolǵan – Gennadıı Golov­kın. Áýesqoılar arasynda álem chempıony, Afıny-2004 Olım­pıadasynyń kúmis júldegeri, kásipqoı boks­ta WBA (Super), IBO jáne WBC (Interim) tujyrymdary boıynsha álem chempıony osy eldi mekendegi №14 shaǵyn aýdanda qarapaıym kenshiniń otbasynda dúnıege kelgen. Bolashaq chempıonnyń balalyq shaǵy da osy jerde ótti. Osyndaǵy №65 orta mektepte oqyǵan. Aýdandaǵy «Fazankanyń» sport zalynda boks degen ónermen alǵash qaýyshqan... Qaraǵandy halqy Maıqudyqtan túlep ushqan muzbalaǵymen oryndy maqtanady. Maqtanyp qana qoımaı, chempıonǵa laıyqty deńgeıde syı-qurmet kórsetýge kelgende de joldan jyǵylǵan emes. Sózimiz jalań bolmas úshin, myna mysaldy keltirsek te jet­kilikti. Bıyl qala ákimdigi Gennadıı Golovkın týyp-ósken Maıqudyqtyń osy 14-shi shaǵyn aýdanynda Deneshynyqtyrý-saýyqtyrý keshenin salýǵa sheshim qabyldady. Amandyq bolsa, 2016 jyldyń sońyna taman paıdalanýǵa berilmekshi bul keshendi Golovkınniń esimimen ataý oıda bar. Búgingi kúnde ákimdik bul máseleniń jaı-japsaryn qarastyryp jatyr. Iаǵnı, bul aıtylǵan ıgi ıdeıalar júzege assa, kezinde bolashaq chempıon ózi quralpy balalarmen dop qýyp, boks álemine alǵash qadam basqan shaǵyn aýdanda óńirde teńdesi joq sporttyq keshen boı kótermek. Jalpy, qazirgi tańdaǵy qalyp­­­tasqan qıyn jaǵdaıǵa qaramas­tan, mundaı biregeı jobany iske asyrý – belgili bir dáreje­de táýekeldi talap etetin dúnıe. Onyń ústine, oblystyq ákimdik­tiń sheshi­mimen kelesi jylǵa jospar­lanǵan qu­rylys bitkenniń toqtaty­la tura­tynyn eske alsaq, bul ǵıma­rattyń bú­gingi kúnniń shyndyǵynan qara­ǵandaǵy mán-mańyzy arta túsedi. Álem chempıonynyń esimimen atalmaqshy bolashaq Deneshy­nyqtyrý-saýyqtyrý kesheniniń ishinde 25 metrlik tórt jolaqty júzý basseıni bolady. Sonymen qatar, 140 adam emin-erkin sy­ıyp ketetin trıbýnasy bar oıyn zaly, aýyr atletterge arnalǵan jáne boksshylar jattyǵatyn zaldar da joba josparynan oıyp oryn alǵan. Sport kesheniniń ishi osyndaı bolǵanda, syrty da kóz súısintetindeı sulý symbatqa ıe bolmaq. Ǵımarattyń atshaptyrym aýmaǵynda sporttyq oıyndarǵa arnalǵan ashyq alańqaılar, jasandy tósenishi bar fýtbol alańy jáne de 140 avtokólikke arnalǵan turaq salynady. Qaraǵandy qalasynyń bas­shylyǵy aıtqandaı, bul sport­tyq ǵımarat zamanaýı sapa talap­tarynyń bárine jaýap bere alatyn keshen bolmaq. Onyń syrtqy kelbeti arhıtektýralyq organdarmen kelisilgen. Ishindegi sport jabdyqtary da búgingi kúnniń suranysyn óteıtin deńgeıde bolatyny belgili. Sóz joq, Maıqudyqtyń qajetin ashyp, ajaryn sulýlandyra túse­tin keleshek deneshynyqtyrý-saýyqtyrý kesheniniń áleýmettik mańyzyn aýyzben aıtyp jetkizý qıyn. Nege deseńiz, dál osy shaǵyn aýdan turmaq, búkil Maıqudyqtyń ózinde mundaı keshen atymen bolǵan emes. Qazaqta «Altyn shyqqan jerdi belden qaz» degen sóz bar. Golo­v­kındeı bokstaǵy ǵajap qubylys túlegen topyraqta mundaı bola­shaq chempıondardyń uıasy bolatyn ǵımarattyń boı kóterýi – zańdylyq! Qaırat ÁBILDINOV, «Egemen Qazaqstan». QARAǴANDY.