Úndistanda jer silkinisinen 11 adam qaza tapty

ASTANA. 5 qańtar. Úndistanda bolǵan jer silkinisten 11 adam qaza tapty. Sondaı-aq, 130 turǵyn túrli jaraqat aldy. Bul týraly TASS aqparat agenttigine silteme jasaǵan egemen.kz tilshisi habarlady. Jer asty dúmpýi Bangladesh astanasy Dakka qalasynyń birneshe aýdandaryna zııanyn tıgizip ótti. Tabıǵat apatynan bul elde úsh adam mert boldy. Úndistan memleketiniń premer-mınıstri Narendra Modı jer silkinisinen zardap shekkenderge arnaıy kómek kórsetilip, qutqarý jumystary júrgiziletinin málimdedi. Mamandar jer asty dúmpýi jergilikti ýaqyt boıynsha saǵat 04:40-ta bolǵanyn aıtty. Al onyń epıortalyǵy Mıanma elimen shektesetin Manıpýr shtatyna qarasty Tamenglong okýrýgynda, 10 km tereńdikte ornalasqan. Tabıǵat apaty Úndistannyń shyǵysynda ornalasqan barlyq shtattarǵa zııanyn tıgizgen. Olardyń qatarynda Batys Bengalııa, Nagalend, Meghalaıa, Arýnachal-Pradesh jáne Manıpýra bar. Al seısmolog mamandary jer silkinisiniń kúshi 6,9 balldy quraǵanyn málimdedi. Jer silkinisi ásirese Manıpýr shtatynyń ákimshilik ortalyǵy Imphal qalasyna zalalyn tıgizdi. Bul mańaıda elektr symdary qıylyp, baılanys úzilgen. Sondaı-aq, ondaǵan úıler qırap qaldy. Aıan Ábdýálı. Derek, sýret: TASS.