Jolbarys pen eshkiniń dostyǵy

Reseıdiń Prımore ólkesindegi safarı-saıabaǵynda Amýr esimdi jolbarys pen Tımýr atty eshkiniń dostyǵy jurtty qaıran qaldyryp keledi. Búginde árbir atqan tańyn dop oınaýdan bastaıtyn ekeýin kórý úshin túkpir-túkpirden aǵylǵan saıahatshylar sany kún sanap artýda. «Kúnde tań bozymen ekeýine dop beremiz. Sol sátte olar óz betterimen túrli oıyn oınaı jóneledi. Bir qarasań, regbı oıynyna uqsaıdy, endi birde fýtbol ma dep qalamyz. Amýr dopty alyp uzap ketedi, Tımýr bolsa, dopqa talasamyn dep birden qýa jóneledi. Syrttaı baqylap túsingenimiz – dopty kim meılinshe tezirek jaryp tastasa nemese tisterimen uzaǵyraq ustap tursa, sol jeńimpaz atanady. Sondaı-aq, ekeýi arnaıy qoıylǵan torly oryndaǵy shyrshany tekserý úshin keledi. Bul aǵashta eshkige arnap túrli jemis-jıdekter men kókónisterdi daıyndap qoıamyz. Amýr úshin butaqtarǵa et ilemiz. Erteńinde odan da bıikteý jerge jipke baılaımyz. Jolbarystyń barynsha sekirip, azyǵyn alyp jatqanyn arnaıy qoıylǵan kamera arqyly túsirip alamyz», – deıdi saıabaq dırektory Dmıtrıı Mezensev. Onyń aıtýynsha, mereke kúnderi saıabaqqa kelgender sany burynǵysynan áldeqaıda artqan eken. Osynyń arqasynda mekeme jumys ýaqytyn da uzartqan. Árbir ekskýrsııaǵa 7-8 mınýt ketedi. Aıta keteıik, osydan bir aı buryn saıabaq qyzmetkerleri eshkini jolbarysqa arnap túski as retinde jibergen. Alaıda, kúni bú­ginge deıin jyrtqysh ań enshili sybaǵasyna tıispeı keledi. Qaıta birge serýendep, birge júrýi kópshilikti tańǵaldyrýda. Tımýr, tipti, kelgen kúni-aq dosynyń jatyn ornyn tartyp alǵan. Olardyń bul qylyǵyn halyqqa kórsetý maqsatynda saıabaq qyzmetkerleri onlaın-translıasııa úshin arnaıy tórt jerden veb-kameralar ornatty. YouTube saıtyna shyǵarylǵan beıne-rolıkteriniń qaralýy mıllıonnan asyp-jyǵylady. Aıan ÁBDÝÁLI.