Mereıtoı aıasyndaǵy mereıli ister

Jańa jylda qaı eńbek ujymy da ótkendi qorytyndylap, aldaǵy kúnderge asqaq murattar men úlken úmitter belgileıtini belgili. Onyń ústine qoı jyly tarıhı oqıǵalar men ataýly merekelerge toly boldy. Mine, Dostyq úıinde osyndaı maqsatta ótkizilgen Qazaqstan halqy Assambleıasynyń 20 jyldyǵyn qorytyndylaýǵa arnalǵan jıynǵa etnomádenı birlestikter músheleri, eńbek ardagerleri, BAQ ókilderi, qala jurtshylyǵy belsendi qatysty. Alqaly jıynda aldymen sóz alǵan oblystyq Qazaqstan halqy Assambleıasy hatshylyǵynyń meń­gerýshisi Jol­das Nurshınniń baıandaýynsha, mereı­toıǵa oraı oblysymyzda 1725 shara uıymdastyrylǵan. «Myń bala» respýb­lıkalyq mádenı-aǵartýshylyq jobasy aıasynda ótkizilgen sharalarǵa 600 bala qatysqan, al memlekettik tildi oqytý kýrstarynan 300-den astam bala sa­baq alǵan, «Meniń Qazaqstanym» úgit poıyzynyń Hromtaý jáne Qan­dyaǵash qalalaryna saparlary barysynda «20 izgi is» estafetasy boıynsha kóptegen qaıyrymdylyq ister uıymdastyrylǵan. Jyldyń erekshe oqıǵalarynyń biri retinde Alǵa aýdanyndaǵy Bolgarka aýylynda etnografııalyq mýzeı-úıdiń ashylýyn aıtýǵa bolady. Oblystyq analar keńesiniń tóraıymy Nadejda Stepanenko Aqtóbede kóp balaly analardyń ónegesi jóninde derekti fılm­der túsiriletinin jetkizse, «Myń bala» baıqaýynyń «Jas sheshender mektebi» atalymynyń júldegeri Gúlnar Ábilova: «Men – ázerbaıjan qyzymyn. Aqtóbedegi №19 mektepte oqımyn. Bizdiń mektebimizde túrli ulttyń balalary oqıdy, biz bir-birimizben qazaq tilinde sóılesemiz», – dedi. Jıynda sóz alǵan oblys ákimi Berdibek Saparbaev táýelsizdiktiń alǵashqy 24 jylynda jetken jetistikterimizdiń bári de elimizdegi yntymaqtyń, birliktiń arqasy ekenin Elbasymyz udaıy aıtyp kele jatqanyn aıryqsha atap ótti. Bizdiń memlekette sandaǵan ulttyń ókilderi turyp jatqanymen, osy jyldar ishinde ultaralyq qaqtyǵystar, túsinispeýshilikter bolmaǵanyn, keri­sinshe, álemge yntymaǵy jarasqan el retinde tanylǵanymyzdy, qandaı qıyn­dyqtardy da aýyzbirshiliktiń arqasynda jeńip shyqqanymyzdy jetkizdi. О́ńir basshysy osy yn­tymaq-birlikti nyǵaıta túsýge etno­mádenı birlestikterdiń basshylary men músheleriniń erekshe úles qosyp otyrǵanyn aıtyp, olarǵa óz rızashylyǵyn bildirdi. Jıyn sońy merekelik konsertke ulasty. Satybaldy SÁÝIRBAI, «Egemen Qazaqstan». Aqtóbe oblysy.