Aqmoldaǵy aıaq kıim fabrıkasy

Aglomerasııalyq aımaqtaǵy Aqmol aýylynda qaıta jańǵyrtylǵan aıaq kıim fabrıkasy ashyldy. Saltanatqa oblys ákimi Sergeı Kýlagın qatysyp, jeńil ónerkásip ókilderine sáttilik tiledi. «SAMHAT» jaýapkershiligi shekteýli seriktestiginiń tarıhy 2008 jyldan bastalǵanymen kásiporynnyń serpilip jumys isteıtin shaǵy endi týǵandaı. Astana qalasynda shaǵyn ǵımaratty jaldap kelgen olar alǵashynda daıyn ónimdi satýmen aınalysty. Al, 2010 jyly jeke seh ashýǵa sheshim qabyldanǵan. Áıtkenmen, ujym óz qabiletin tolyq kórsete almaǵandaı. Aqyrynda «SAMHAT» JShS Aqmol aýylyna kóship, jergilikti bıznestiń órisin keńitýge bel baılaıdy. Usynysty oblys jáne aýdan basshylyǵy qoldady. Arnaıy sheshimmen 2013 jyly 1,2 gektar jer telimi men 1200 sharshy metrlik garaj ǵımaraty bólindi. Jóndeý jáne jabdyqtaý jumystarynan keıin kásiporyn tolyq qýatynda jumys isteı bastady. Máselen, 2015 jyldyń on bir aıynda ǵana 800 mıllıon teńgeniń 100 myń jup aıaq kıimi ıgilikke jaratyldy. – Biz taza teriden tigilgen aıaq kıimniń 20 túrin shyǵaramyz, – deıdi fabrıka dırektory Samal Tileýbaeva. – «SAMHAT» JShS negizinen qorǵanys salasynyń memlekettik tapsyrysyn oryndaıdy. Aqmol aýylynda jumys aýqymyn keńeıtýge múmkindik týyp otyr. Sondyqtan, 2016 jyly ónim shyǵarýdyń jyldyq kólemin 500 myń jupqa jetkizý jáne eksporttyq baǵdar ustaný nıetindemiz. Qazir kásiporyn 60 adamdy turaqty jumyspen qamtydy. Aldaǵy kezde onyń sany 200-ge jetedi. Baqbergen AMALBEK, «Egemen Qazaqstan». Aqmola oblysy, Selınograd aýdany.