Aldymyzda jaýapkershiligi zor mindetter tur

Elbasymyz N.Nazarbaev bıylǵy Qazaqstan halqyna Joldaýynda elimizdi búgingi kúrdeli jaǵdaılardan aýyr saldarsyz alyp shyǵyp qana qoımaı, ári qaraı damytýǵa baılanysty naqty tapsyrmalar berip, baǵdarlamalardy qandaı merzimde jáne qalaı oryndaýdyń tetikterine deıin kórsetti. Prezıdent bıylǵy jyldyń 30 qarashasyndaǵy Qazaqstan halqyna arnaǵan Joldaýynda adam faktoryn birinshi orynǵa qoıdy. Ásirese, ol jastar bolashaǵyna erekshe nazar aýdaryp, qazirden bastap talmaı eńbek etý kerektigin basa aıtty. «Keń baıtaq elimizdiń qaı aımaǵynda, qandaı jumys bolsa da qoryqpaı, sonda baryp jumys isteý kerek, – dedi Elbasy. – Jastarymyz ózderi tańdaǵan mamandyqtyń shynaıy sheberi bolýy tıis. Eger óz salasynyń shyn sheberi bolýǵa talpynys jasasa, jumys ta, qyzmet te tabylady». Sondaı-aq, N.Nazarbaev Joldaýda: «Men jastarymyzdy jumysshy mamandyǵyn belsendi meńgerýge shaqyramyn. Kezinde men de jumysshy kıimin kııýden bastadym, domna peshi ot-jalynynyń janynda turdym. Úlgi alyńdar! Jyldar ótedi, biraq osy ómirlik tájirıbeleriń, sender qandaı ómir jolyn tańdap alsańdar da mindetti túrde kádelerińe jaraıdy», – degendi qadap aıtty. Rasynda da eren eńbek pen mańdaı ter arqyly ómirden laıyqty oryn alýǵa bolatynyn dana halqymyz san ǵasyrlar boıǵy tájirıbesinen kórip-bilip keledi. Osy rette ózimniń eńbek jolymdy týǵan jerim – Qaraǵandydaǵy shahtada qarapaıym jumysshy, shahta qazýshysy bolyp bastaǵanymdy ystyq yqylaspen eske alamyn. Joldaýda, sonymen birge, 2017 jyldan bastap elimizde kásiptik-tehnıkalyq bilim alý úshin qosymsha granttar bólinip, tegin bilim beriletini týraly aıtyldy. «Barshaǵa arnalǵan tegin kásiptik-tehnıkalyq bilim» baǵdarlamasy jumysyn bastaıtyn bolady. Egemen elimizdegi Elbasymyzdyń bastaýymen júzege asyrylý ústindegi túbegeıli reformalar men júrgizilip jatqan qyrýar isterdiń barlyǵy jastar úshin, elimizdiń bolashaǵy úshin jasalyp jatqany – búgingi kúnniń shyndyǵy. Joldaýdaǵy Elbasynyń bergen tapsyrmalary «100 naqty qadam» Ult jospary baǵdarlamasyndaǵy mindettermen tikeleı baılanysty. Joldaý arqyly Úkimetke de, Parlamentke de, oblys pen qala ákimderine de naqty tapsyrmalar berildi. Aldaǵy jyly elimizde atqarylatyn mindetter osy Joldaý arqyly júretin bolady. Aıtylǵan reformalardy júzege asyrý úshin Parlamentte qajetti negizgi zańdar qabyldandy. Elbasy N.Á.Nazarbaev: «Bizdiń maqsatymyz – eli baqytty, jeri gúldengen qasıetti Otanymyz Qazaqstandy «Máńgilik El» etý! Álemdegi eń damyǵan 30 memlekettiń qataryna qosylyp, baı da qýatty eldermen ıyq túıistirý. Biz bul maqsatymyzǵa mindetti túrde jetemiz. Aldaǵy kele jatqan kúrdeli kezeń biz úshin eńserý kezeńi bolady. Biz jańa jahandyq daǵdarysty mindetti túrde jeńemiz. Bul úshin bizde birtutas erik-jiger, halyq birliginiń berik dástúrleri bar. Biz Qazaqstanymyzdy damýdyń jańa shepterine shyǵaratyn bolamyz!» – degendi nyq senimmen aıtty. Kóshbasshymyz N.Á.Nazarbaev taǵy da ózi bas bolyp, kóregendik tanytyp, barlyq saıası partııalardy, qoǵamdyq birlestikterdi, barlyq azamattardy Otanymyzdyń ıgiligi jolyndaǵy ortaq iske bir jaǵadan bas, bir jeńnen qol shyǵaryp, uıymshyldyqpen jumylyp, atalǵan Joldaýdy júzege asyrýǵa belsene qatysýǵa shaqyrdy. Elbasymyz óz Joldaýynda bizdiń birneshe qundy­lyqtarymyzdy da atap ótti. Birinshiden, táýelsizdigimizdiń tuǵyryn nyq etip, bıikke kóterý, ekinshiden, eldiń muraty úshin adal eńbek etý, birimiz bárimiz úshin, bárimiz birimiz úshin tynbaı eńbektený, úshinshiden, osynyń barlyǵyn keleshek urpaq múddesi úshin jasaý sııaqty Elbasymyzdyń Qazaqstan halqyna Joldaýyn júzege asyrýda árbirimizdiń aldymyzda jaýapkershiligi zor mindetter tur. Muhtar ALTYNBAEV, Parlament Senatynyń     depýtaty.