Táýelsizdik – tuǵyrym

Aqtóbe óńirinde Qazaqstan halqy Assambleıasynyń Qazaqstan Respýblıkasy Táýelsizdiginiń 25 jyldyǵyna arnalǵan «Úlken el – úlken otbasy» respýblıkalyq jalpyulttyq aksııasy bastaý aldy. Oblys ortalyǵyndaǵy «Qonys» sport saraıynda ótken keń aý­qym­dy merekelik sharaǵa 4 myńnan astam adam qatysty. Sharaǵa qaty­sý­shylar qatarynda eńbek arda­gerleri, jastar, joǵary jáne orta ar­naýly oqý oryndarynyń stý­dentteri men oqytýshylary, úki­met­tik emes uıymdar men etnomádenı birlestikterdiń ókilderi boldy. 1000 adam qatysqan teatr­lan­dyrylǵan qoıylymda elimizdiń táýelsizdik alǵan sátinen bastap búginge deıingi júrip ótken joly aı­shyqty ajarlandyryldy. Aldy­men sahnalanǵan qoıylym qaza­ǵymnyń altyn besigi – aýyl kóship kel­gendeı áserge bóledi. «Máńgilik El» ıdeıasyn beınelegen kórinister de kóńildi tolqytarlyq boldy. Sodan keıin sahna tórine elimizdiń memlekettik rámizderi keltirildi. Kók baıraǵymyzdy jelbiretken sportshy jastar ortaǵa shyqty, Eltańbamyz keltirildi. Hor ujym­darynyń qosylyp oryndaýyn­da Ánuranymyz asqaqtady. Shara ba­rysynda patrıottyq ánder shyr­qaldy, úlken ekrannan Jeltoqsan oqıǵasyn beınelegen kórinister kórsetildi. Aksııaǵa aq jol tilep, jınal­ǵandarǵa salıqaly sóz arnaǵan oblys ákimi Berdibek Saparbaev eli­mizdiń egemendik alǵan jyl­dardaǵy jasampaz isterge toly jolyna toqtalyp, barlyq jeńis­terimiz ben jetistikterimizdi El­basy N.Nazarbaevtyń sarabdal saıa­satkerligimen sabaqtastyrdy. Odan ári óńir basshysy ústimizdegi jylǵy qańtar aıynda oblystyń barlyq aýdandaryn aralap shyǵatyn úgit poıyzynyń saparyna sáttilik ti­ledi. Poıyz quramynda medısı­na qyzmetkerleri, zańgerler, «Nur Otan» partııasynyń, «Damý» kásipkerlikti damytý qorynyń ókilderi bar. Sımvolıkalyq «Dostyq shańy­raǵy» astyna etnomádenı bir­les­tikter ókilderi jınalyp, ulttyq kıimder kıingen ulttar ókilderi áp-sátte «Dostyqtyń gúldestesine» aı­nalyp júre berdi. Ústimizdegi jyly óńirde Táýelsizdiktiń 25 jyl­dyǵyna arnalǵan 5 myńnan astam ártúrli shara ótkizý kózdelýde. Osy kezeńde keminde 25 áleýmettik ny­san paıdalanýǵa beriledi dep kútilýde. Aqtóbeden bastaý alǵan bul shara elimizdiń barlyq oblystarynda jarasty jalǵasady. Sát sapar, saǵan, azattyq pen azamattyqtyń aksııasy. Satybaldy SÁÝIRBAI, «Egemen Qazaqstan». Aqtóbe oblysy.