«Barys» qatarynan besinshi ret qarsylasynan basym tústi

ASTANA. 11 qańtar. Búgin Astananyń «Barysy» Qurlyqtyq hokkeı lıgasy sheńberinde Tolıattıde jergilikti «Lada» komandasymen synǵa tústi. Tartysty ótken oıyn nátıjesinde astanalyqtar 4:1 esebimen basym túsip, qatarynan besinshi ret jeńiske jetti. Bul týraly egemen.kz tilshisi habarlady. Kezdesýdiń bar bolǵany 30-sekýndynda qonaqtar esep ashty. «Á» degennen alǵa umtylǵan «Barys» oıynshylary Naıdjel Doýstyń dál soqqysynyń arqasynda alǵa shyqty. Úziliske deıin aıdyn ıeleri tarazy basyn teńestirýdiń amalyn taba bildi. Atap aıtqanda, 15-mınýtta oıynshy basymdyǵyn júzege asyrǵan reseılikter Dmıtrıı Vorobevtiń kómegimen esepti 1:1-ge jetkizdi. Ekinshi kezeń taǵy da bizdiń komandanyń belsendiligimen bastaldy. Nátıjesinde 22-mınýtta Naıdjel Doýs dýbldiń avtory atandy. Sońǵy kezeńniń alǵashqy mınýtynda «Barys» oıynshylary esepti eseledi. Bul joly kók jolaqtyń boıynan qarsylastar qaqpasyn dál kózdegen Brendon Bochenskıdiń mereıi ústem boldy. Arada 4 mınýt ótkende Doýs úshinshi shaıbasyn soǵyp, het-trık jasady. Oıynnyń qalǵan ýaqytynda esep ózgergen joq. Osy jeńisinen keıin Andreı Nazarovtyń shákirtteri 72 upaımen Shyǵys konferensııasyndaǵy 7-ornyn saqtap qaldy. Al 58 upaıy bar «Lada» týrnır kestesinde 12-orynda tur. Aıta keteıik, «Barys» kelesi kezdesýin 13 qańtar kúni qonaqta Iаroslavldiń «Lokomotıvimen» ótkizedi. Elaman Qońyr. Derek: egemen.kz. Sýret: hcbarys.kz.