Qazaqstan – belsendi ári senimdi áriptes

Keshe Aqordada Memlekettik hatshy Gúlshara Ábdiqalyqova Eýropadaǵy qaýipsizdik jáne yntymaqtastyq jónindegi uıymnyń (EQYU) Astana qalasyndaǵy Baǵdarlamalar ofısiniń basshysy Natalııa Zarýdnamen kezdesti. Bul kezdesý EQYU ókiliniń elimizdegi dıplomatııalyq mıssııasynyń aıaqtalýyna oraı uıymdastyryldy. Kezdesý barysynda Memle­ket­tik hatshy Qazaqstan atalǵan Uıym­men birlesken 62 jobany sátti júzege asyrǵanyna basa nazar aý­dara kelip, EQYU ókili N.Zarýd­nanyń tabysty qyzmetine toqtaldy. «Biz Eýropadaǵy qaýipsizdik jáne yntymaqtastyq jónindegi uıymnyń Astana qalasyndaǵy Baǵdarlamalar ofısimen óte yntymaqtasa jumys júrgizip kelemiz. Bul baǵyttaǵy sharalardy júzege asyrý isi, ásirese, Ofıs basshysy Natalııa Zarýdnanyń belsendi áreketimen qarqyn ala túskendeı. Máselen, 2015 jyldyń ózinde bizdiń elimiz osy Uıymmen birlese túrli salalar boıynsha 62 jobany júzege asyrdy. Bulardyń ishinde ekonomıkaǵa, kóshi-qonǵa, adam quqynyń qorǵalýyn qamtamasyz etýge, óńiraralyq máselelerdi tıimdi sheshýge qatysty semınar-keńester uıymdastyrý jobalary boldy. Ásirese, aýyl áıelderine baılanysty atqarylǵan sharýalardyń nátıjesine kóńil tolady. Bularǵa qosa, ekologııa men «Jasyl ekonomıkaǵa» ótý joldaryn halyqqa tanystyryp, túsindirý jumystarynyń jospary da sátimen oryndaldy. Sondyqtan da, Natalııa Zarýdna hanymǵa elimizde tabysty eńbek etkeni úshin elimiz jurtshylyǵynyń atynan zor alǵysymdy jetkizgim keledi», – dedi G.Ábdiqalyqova. Sondaı-aq, Memlekettik hatshy ekijaqty kezdesý sátinde Qazaqstan men EQYU yntymaqtastyǵynyń tarıhy zor ekenin, EQYU-nyń Astana qalasynda ótken Astana sammıtin jáne Astana Deklarasııasynyń qabyldanýyn atap kósetti. Onyń sózine qaraǵanda, Qazaqstan óziniń tóraǵalyǵy barysynda Uıym sheńberinde tepe-teńdik negizinde árekettestikti damytýǵa daıyn, belsendi ári senimdi seriktes retinde mártebesin bekitken. Sonymen qatar, kezdesýde sońǵy jyldary EQYU-nyń Astana qalasyndaǵy Baǵdarlamalar ofısiniń uıymdastyrýymen Uıym Hatshylyǵynyń jáne EQYU qurylymdyq bólimsheleri basshylyǵynyń Qazaqstanǵa birneshe sapary uıymdastyrylyp, sondaı-aq, elimizde jáne shetelderde túrli turpattaǵy áskerı-saıası, ekonomıka-ekologııa jáne adamı ólshemder salalaryna qatysty birqatar is-sharalar ótkizilgeni atap kórsetildi. Shara aıasynda taraptar Qazaqstannyń EQYU baǵytyndaǵy yntymaqtastyqtyń qazirgi ahýalyna jáne bolashaq perspektıvalaryna qatysty keń aýqymdy máselelerdi talqylap, óńirlik jáne halyqaralyq kún tártibindegi ózekti taqyryptar boıynsha pikir almasty. О́z kezeginde Natalııa Zarýdna sońǵy 4 jylda EQYU ókili retinde Qazaqstanda jumys istegenin zor mártebe kóretinin aıta kelip, Astana Deklarasııasynyń rólin joǵary baǵalady. Sonymen birge, N.Zarýdna elimizdiń áleýeti men mol múmkindikterin sóz etti. Joldybaı BAZAR, «Egemen Qazaqstan».