PETROPAVL. 12 qańtar. Bıyl oblys ortalyǵynda 1011 páterli 11 kóp qabatty turǵyn úıdi iske qosý josparlanyp otyr. Bul týraly Soltústik Qazaqstan oblystyq ákimdiginiń baspasóz qyzmeti habarlady.
Aımaq basshysy Erik Sultanov Petropavl qalasyndaǵy qurylys alańdarynda bolyp, ondaǵy jumys barysymen tanysty. Bereke yqshamaýdanynda ornalasqan Gastello kóshesi boıynda 220 páterlik 3 kópqabatty úı boı kóteredi. Budan tysqary 296 páterli úsh úıdiń qurylysy jaqyn arada qolǵa alynady. Merdigerlikpen aınalysatyn «PMK-5», «Stroıkompanııa», «Osnovanıe» kompanııalarynyń basshylary jergilikti qurylys materıaldarynyń sapalyq, beriktik qasıetterimen tanystyrdy. Iýbıleınyı kóshesi boıynda toǵyz qabatty úıdiń qurylysy aıaqtalyp keledi. Qoldanysqa berilse, jaldamaly-kommýnaldyq baspanaǵa 126 otbasy ıe bolmaq.
«Báıterek Development» AQ-nyń qarajatyna toǵyz qabatty eki turǵyn úı salynýda. Mamyr aıynda qoldanysqa beriledi. Bas merdigerler – «DorStroıTrest» jáne «Rýslan servıs LTD» kompanııalarynyń ókilderi jumystyń keste boıynsha uıymdastyrylǵanyn jetkizdi. Búginde 4 qabat turǵyzyldy, ınfraqurylymdyq jeliler tartyldy.
Tutastaı alǵanda, oblys ortalyǵynda barlyǵy 1011 páterli 11 úıdi paıdalanýǵa berý kózdelgen.
О́mir Esqalı.
Derek, sýret: Soltústik Qazaqstan oblystyq ákimdiginiń baspasóz qyzmeti.
