Júrek talmasynyń erler men áıelderde ártúrli bolatyny anyqtaldy

ASTANA. 26 qańtar. Erler men áıelder arasyndaǵy júrek talmasynyń aıyrmashylyqtary anyqtaldy. Bul týraly lenta.ru aqparat agenttigine silteme jasaǵan egemen.kz tilshisi habarlady. Amerıkanyń Circulation kardıologııalyq qaýymdastyǵynyń jýrnaly áıelder júrek talmasynyń sebepteri, belgileri men zardaby erlerge qaraǵanda ózgeshe bolatyny týraly habarlap otyr. XXI ǵasyrda AQSh-ta júrek-qan tamyrlary aýrýlarynan kóz jumatyndardyń sany edáýir azaıǵanymen, áıelder bul dertten erlerge qaraǵanda kóbirek qaıtys bolady. Munyń sebebin ǵalymdar áıelder arasynda júrek aýrýlaryn áli kúnge deıin nashar emdeý jáne aýrýdyń sebebin kesh anyqtaýmen baılanystyryp otyr. Mıokard ınfarktisiniń basty sebebi júrekke aparatyn negizgi qan tamyrynyń bitelýi bolyp tabylady. Erlerge qaraǵanda, áıelderde tamyrdyń bitelýi asa qaýipti bolmaıdy, sol sebepti olarǵa arterııany keńeıtýdiń qajeti joq. Alaıda, názik jandarda júrekke aparatyn qan tamyry jıi buzylatyndyqtan júrek bulshyq etine qan kelýiniń azaıýyna ákep soǵýy múmkin. Bul derttiń saldary da sol – júrek talmasy. Erler men áıelder úshin de júrek talmasynyń basty belgisi – keýde tusynyń shanshýy bolyp sanalady. Degenmen, áıelderde tynystyń bitýi, júrektiń aınýy, arqanyń aýrýy sekildi ózge de belgiler bolýy múmkin. Emdeýge keletin bolsaq, áıelder qan aǵysy qalpyna kelgennen keıin bul derttiń asa aýyr asqynýymen betpe-bet keledi. Sebebi, olardyń qan tamyrlary ádette kishirek bolyp keledi. Sondyqtan da qyz-kelinshekter kóbine-kóp dıabet jáne joǵary qan qysymy sekildi táýekel faktorlardan zardap shegedi. Sondaı-aq, dárigerler áıelderge júrek aqaýyn qalpyna keltirý jóninde sırek keńes beredi. Al, názik jandar qalpyna keltirý baǵdarlamasyn sońyna deıin jetkizbeıdi. Elaman Qońyr. Derek: lenta.ru. Sýret: asosudy.ru.