Zardap shekkender úsheý me, álde bireý me?

Jambyl oblysyndaǵy T.Rysqulov aýdany ortaly­ǵynan 100 shaqyrym qashyq­tyqta MI-2 tikushaǵy apat­qa ushyraǵanyn aqparat qu­ral­dary jarysa jazýda. Apat saldarynan 1 adam zar­­dap shekti. Bul týraly QR IIM Tótenshe jaǵdaılar jó­nindegi komıtetiniń arnaıy ókili Rýslan Imanqulov habarlaǵan bolatyn. «Oqıǵa Turar Rysqulov aýdanyndaǵy Sadyhan qystaýynan úsh sha­qyrym qashyqtyqta bolǵan. Tótenshe oqıǵa jaıly habar 112 telefonyna 23 qańtarda keshki ýaqytta kelip túsken», dep habarlady R. Imanqulov. Osydan keıin tikushaqtyń qulaý faktisi boıynsha arnaıy komıssııa quryldy. Artynsha zardap shekken ushqyshtyń esimi de belgili boldy. Ol tik­ushaq tıesili «Taraz Jańa Álem» kompanııasynyń dırektory Valerıı Mıhın eken. Jansaqtaý bóliminde jatqan 62 jastaǵy Valerıı Mıhınniń beti, basy, aıaq-qoldary I-II-III dárejede kúıip qalǵan. Sonymen qatar, onyń tynys alý joldaryn II dá­rejedegi kúıik shalǵan. «Naýqastyń aıtýyn­sha tik­ushaqtyń áýede qozǵalt­qyshy órtengen. Jerge qon­ǵan­nan keıin ol tikushaqty ózi sóndirmek bolypty. Odan keıin shamamen 5 shaqyrym jaıaý júrgen. Sol mańdaǵy qoı­­shylardyń kómegimen ol Taraz qalasyndaǵy aýrý­hanaǵa jetkizilgen. Jalpy ja­ǵdaıy aýyr. Aqyl-esin biledi», deıdi bul jóninde Jambyl oblystyq densaýlyq saqtaý basqarmasy baspasóz qyzmetiniń ókilderi. Árıne, mundaı kezde «Te­miri qurysyn, tikushaq tabylar, eń bastysy adam aman bolsyn» dep, aldymen arystaı azamattyń saýlyǵyn tileıtiniń anyq. Áıtse de apatqa ushy­raǵan bul tikushaq týraly ártúrli áńgime órbýde. Áýede shyr aınalyp baryp jerge qulap, artynsha jarylǵan tikushaqty kórgen sol mańdaǵy qoıshylar ushqyshtyń qasynda taǵy eki adam bolǵanyn aıtady. Al, aýrýhanaǵa bir-aq adam túsken. Sonda tikushaqta bolǵan taǵy eki adam qaıda? Olar týraly nege aıtylmaıdy? Túsiniksiz. Qalaı aıtsaq ta bul jumbaqtyń sheshýin arnaıy qurylǵan komıssııa anyqtaıdy degen úmit bar. Oralhan DÁÝIT, «Egemen Qazaqstan». Jambyl oblysy.