Atyraýda anasyn balaǵattaǵan er adamǵa úkim shyqty

ATYRAÝ. 27 qańtar. Atyraý oblysynyń Qulsary qalasynda jergilikti turǵyn óz anasyna zábir kórsetkeni úshin 100 saǵatqa qoǵamdyq jumysqa tartyldy. Bul týraly oblystyq sottyń baspasóz qyzmetine silteme jasaǵan egemen.kz tilshisi habarlady. Elimizdegi shaǵyn qalanyń biri – Qulsaryda turatyn soqtaldaı jigit basqa emes, ózin 9 aı qursaǵynda kóterip, aıalaǵan anasyna til tıgizipti. Árıne, ol úıine araq iship kelip, mas kúıinde anasyn esh sebepsiz boqtap-balaǵattap, súıreleýmen shektelmeı, betinen teýip, soqqy da jasaǵan. Balasynan boqtyq sóz estip, soqqy jeý ana úshin ońaı emes, ol qorǵaný maqsatynda betin alaqanymen jaýyp qalǵan. Balasynyń óreskel áreketinen ábden kóńili qalyp, júregine qaıaý túsken ana sotqa júginedi. О́ıtkeni, anasynyń sotta málim etkenindeı, balasy kún saıyn úıine araq iship keledi eken. О́zi ósip-óngen shańyraǵynyń shyrqyn buzyp, berekesin ketiretin balasyn jazalaýdy ótinedi. Ras, sot otyrysynda kináli óz kinásin tolyq moıyndady. Sóıtip, «Balamnyń tabanyna qadalǵan shóńge mańdaıyma qadalsyn» dep, eseıse de aıalaýyn aıamaıtyn anasynan keshirim surady. Taraptardyń ýájderin tyńdaǵan Jylyoı aýdandyq soty kinálini Qylmystyq kodekstiń 108-babymen aıypty dep tanyp, 100 saǵatqa qoǵamdyq jumysqa tartý jóninde úkim shyǵardy. Joldasbek Shópeǵul. Derek: Atyraý oblystyq sotynyń baspasóz qyzmeti. Sýret: rbc.ua.