Úshqońyrda báısheshek gúldedi

Tańsáriden Úshqońyr aýylyn betke alyp kelemiz... Sirá, bul joly tabıǵat túsirilimi sátsiz bolatyndaı. Almatydan qansha shaqyrym alystasaq ta, qara tútinmen tumshalanǵan bulyńǵyr aspan sońymyzdan qalar emes. Kókten aq kórpeli keńistikke qıǵash túsken kún kózi kóz qaryq­tyrady. Alystaǵy Alataý tipti buldyr beınege aınalǵan. Sý­retke túsirý turmaq, bederin tamashalaý da múmkin emes. Desek te, sol jotalarǵa jol tartyp ke­lemiz. Shamalǵan ózeninen asyp, Úshqońyr jaılaýyn kesip ótip, ózi attas Alataý jotalaryna qaraı órledik. Anadaı bıikte bir top tabyn jaıylyp júr. Qasyna baryp, jaqynnan túsirilim jasaý úshin, sol bıikke tótesinen shyǵýǵa týra kelgen. Sátti kórinister túsirgeni óz aldyna, tabıǵat ǵajaıyptaryna eriksiz kýá boldyq. Kóktem ny­shany – báısheshekter osy Úsh­qońyr jotasynda qaýyzyn jarypty. Ádette, ońtústik óńirde baıqalatyn tosyn qubylys, qa­lyń qar basqan bizdiń Alataýdan qaıtalanǵanda, ne derińdi bilmeı qalady ekensiń?! Bıyl Alataý tabıǵaty qyzyq bolyp barady, tamyzda qalyń qar jaýyp, ásem jelektiń belinen úzgen edi, endi qytymyr qańtar kelgende, taǵy da minezi kúrt ózgerip, báısheshekpen tóńirekke kóktem lebin sezdirgendeı... Úshqońyrdyń symbatty jotalary bolsa, osy tylsym syrymen kópshilikke bóliskendeı... Al taýdyń keń shat­qaldaryn aralaı qozǵalsańyz, móldir tunyq bulaqtarǵa kezigesiz. Birinshi, ekinshi, úshinshi bulaq dep jalǵasa beredi... Tipti, birinshi bulaqty taýda demalys jasaýshy­lar úshin arnaıy kórkemdep, baryspen bezendiripti, tipti, dem­alyp, tynyǵý úshin, arnaıy oryn­­dyqtarmen jabdyqtalǵan. Sha­maly tynyqqannan keıin, shat­qal­men bıikke órleseńiz, taý dıdary birinen soń biri jalǵasyp, erekshe aıshyqtalady. Alystan syǵalaǵan Kún kózi de, tóńirekke ózgeshe reń bergen... Dosjan BALABEKULY. Sýretti túsirgen avtor